Ձեր վստահելի աղբյուրը

Հայաստանում գործող 4 բուքմեյքերական ընկերությունները միասին տարեկան ունենում են ավելի քան 120-130 մլն դոլարի շրջանառություն: Նրանք պետական բյուջե են վճարում 2 մլրդ դրամից ավելի հարկ, ունեն մի քանի հազար աշխատատեղ: Տարեցտարի ոլորտում շրջանառության 20-30 տոկոս աճ է նկատվում: Ընկերություններն իրականացնում են ահռելի ծախսեր՝ գովազդի համար: Ընկերություններից որևէ մեկը վնասով չի աշխատում:

Panorama.am-ի հետ զրույցում նման տվյալներ ներկայացրեց տնտեսագետ Մեսրոպ Առաքելյանը: Խաղադրույքների չափի, խաղադրույք կատարողների թվի ու այլնի մասին նա թվային տվյալներ չունի, ընկերությունների ֆինանսական հաշվետվությունները փակ են պահվում:

Տնտեսագետը ցավ է հայտնում, որ այդ ընկերությունների գրասենյակներում սպորտային խաղերը հետ են մղվել, դրանք կամաց-կամաց վերածվում են կազինոների, որտեղ կարելի է ժամեր անցկացնել, նաև շահումով խաղեր խաղալ:

«Շրջանառության աճին նպաստել են գովազդները, որոնք բերել են խաղացողների թվի աճի: Հիմա խաղադրույք կատարելը շատ հեշտ է ու հասանելի: Դեռահասները կարող են խաղադրույք կատարել տնից հեռախոսով, ծնողների ներկայությամբ, տերմինալի միջոցով»,-ասաց նա:

Նա կարծում է, որ այդ ընկերությունների ծառայություններից առավելապես օգտվում են երիտասարդները՝ ելնելով արագ հարստանալու, առկա ֆինանսական խնդիրները լուծելու ցանկությունից ու մղումից, իսկ դրանցից օգտվելու պատճառը սոցիալական պայմաններն են ու մեծ գործազրկությունը:

«Ղումարբազությունը դարձել է նաև աշխատանք աղքատ բնակչության համար, ովքեր փորձում են արագ փող աշխատել։ Այն օգուտները՝ հարկերի տեսքով, որ կան, համադրելի չեն առկա ու հետագայում սպասվելիք վնասների հետ: Իհարկե, այդ ընկերությունների գործունեության դադարեցման հետևանքով խնդիրներ կլինեն նաև աշխատատեղերի հետ կապված, սակայն ամեն գնով հիմնավորել բյուջետային մուտքերն, այդքան էլ ճիշտ չէ, վճարված հարկերի շնորհիվ հասարակությանը  տված օգուտը շատ ավելի քիչ է, քան դրա հետևանքով առաջացած խնդիրները»,-կարծիք հայտնեց նա:

Մ. Առաքելյանի հաշվարկով, այդ ընկերությունների բյուջե վճարած գումարը կազմում է կենսաթոշակների համար տարեկան վճարվող գումարի ընդամենը 1 տոկոսը:

Եթե օրենքով արգելվի դրանց գործունեությունը, ապա, ըստ Panorama.am-ի զրուցակցի, հասարակության համար արդյունքները կլինեն միայն դրական, որոշակի ռիսկեր կարող են առաջանալ բիզնեսի համար: Այդ պատճառով նա առաջարկում է կտրուկ արգելքի փոխարեն դրան հասնել  աստիճանաբար՝ սկզբում կիրառելով մի շարք սահմանափակումներ՝ օրինակ որպես առաջին քայլ արգելել գովազդը, թույլ չտալ բուքմեյքերական գրասենյակների տեղակայումը բնակելի շենքերի, ուսումնական հաստատությունների հարևանությամբ, առայժմ թույլ տալ խաղադրույքներ կատարել միայն սպորտային իրադարձութունների վրա, կրճատել խաղադրույքի առավելագույն շեմը:

«Պետք է փորձել ներդրողների վնասները քչացնել, որպեսզի այն հետագում չազդի ներդրումային միջավայրի վրա, դրսի մարդիկ չմտածեն, որ հայկական մշակութային մենթալիտետի պատճառով կարող են նման կտրուկ որոշումներ կայացվել»,-ասաց նա:

Հիշեցնենք, որ ԱԺ հանրապետական պատգամավոր Սամվել Ֆարմանյանը հայտարարել էր. «ՀՀ-ում պետք է օրենսդրորեն արգելել բուքմեյքերական գրասենյակների գործունեությունը, ներառյալ դրանց ինտերնետ ծառայությունները՝ տեղական թե միջազգային, ինչպես նաև on-line խաղատների գործունեությունը, կրկին, ինչպես տեղական, այնպես էլ միջազգային»:

Մեսրոպ Առաքելյանը հույս ունի, որ գործող կառավարության օրոք այն կարճ ժամանակում կընդունվի, բացի այդ նա կարծում է, որ հնարավոր արգելքի դեպքում բարեփոխումների շնորհիվ բյուջե այլ մուտքեր կապահովեն, ինչը կկոմպեսացնի բուքմեյքերական ընկերությունների կողմից բյուջե հարկեր չվճարելը: