Ձեր վստահելի աղբյուրը

Զինվորական ծառայության ընթացքում զոհված  ծնող, եղբայր կամ քույր ունեցող, ընտանիքի միակ արու զավակ քաղաքացին կազատվի ծառայությունից:

ՀՀ պաշտպանության նախարարի տեղակալ Գաբրիել Բալայանն այսօր լրագրողների հետ ճեպազրույցում ներկայացնելով  «Զինվորական ծառայության և զինծառայողի կարգավիճակի մասին» ՀՀ օրենքում լրացումներ կատարելու մասին» օրենքի նախագիծը՝ նշեց, որ պարտադիր զինվորական ծառայությունից ազատվելու իրավունք է ստանում զորակոչի ենթակա այն քաղաքացին, ով ընտանիքի միակ արու զավակն է և ունի Հայաստանի Հանրապետության պաշտպանության մարտական գործողությունների կամ զինված ուժերում կամ այլ զորքերում կամ միջազգային պայմանագրերով ՀՀ –ում տեղակայված օտարերկրյա պետությունների զինվորական ստորաբաժանումներում զինվորական ծառայության ընթացքում զոհված (մահացած) ծնող կամ եղբայր կամ քույր:

Փոխնախարարի խոսքով՝ «Զինծառայության և զինծառայողի կարգավիճակի մասին» օրենքի գործող կարգավորմամբ այդ տղաները զորակոչվում էին ոչ մարտական հերթապահություն իրականացնող զորամաս կամ ոչ մարտական հերթապահություն իրականացնող մասնագիտությամբ:

«Հիմա մենք առաջարկում ենք, որ ընտանիքի միակ արու զավակն  ընդհանրապես ազատվի ծառայությունից, եթե մարտական առաջադրանք կատարելու ժամանակ նրա հայրը, մայրը, քույրը կամ եղբայրը զոհվել են»,- ասաց Գաբրիել Բալայանը:

Երկրորդ փոփոխությունով  նախատեսվում է մեկ անգամ տարկետում ստանալու իրավունք վերապահել այն քաղաքացիներին, որոնք մինչև 19 տարեկանը լրանալը ստացել են օրենքով սահմանված տարկետում հանրակրթական կամ առանց ընդհատման նախնական (արհեստագործական) կրթական ծրագրով սովորելու համար, սակայն նշված տարիքը լրանալու օրվա դրությամբ դեռ չեն ավարտել ուսումնառությունը:

Այսինքն՝ 19 տարին լրացած և հանրակրթական դպրոցում սովորող զինակոչային տարիքի երիտասարդներին  տարկետում կտրամադրվի`մինչև ուսումնառության ավարտը:  «Այս զորակոչի համար ունենք 11 հոգի, որոնցից 10-ը Հայաստան են վերադարձել Ռուսաստանի Դաշնությունից, որտեղ կրթական ծրագրի տևողությունը 11 տարի է, իսկ Հայաստանում՝ 12: Այստեղ նրանք մեկ տարի ցածր դասարան են նստում, դրա համար էլ դպրոցն ավարտում են 19 տարեկանում»,- նշեց Գաբրիել Բալայանը:

Հաջորդ փոփոխությամբ նախատեսվում է 2018-2019 թթ-ի ուսումնական տարվա  ընթացքում որոշ քաղաքացիների համար վերականգել պարտադիր զինվորական ծառայությունից ազատման իրավունքը:

«Առաջարկվել է փոփոխություն, որի համաձայն՝ մարզային և Երևանի հանձնաժողովները կկարողանան եզրակացություն տալ 2018-19թթ.  ուսումնական տարվա ընթացքում այն ուսանողների համար, որոնք ընդունվել են բուհ տարկետման իրավունքով, սակայն, հաշվի առնելով, որ նրանց 18 տարեկանը դեռ չէր լրացել, հնարավոր չի եղել նրանց տարկետումը ձևակերպելու: Հիմա այդ փոփոխությամբ նախատեսվում է տարկետումը ձևակերպելու հնարավորությունը», - ասաց Գաբրիել Բալայանը: