Ձեր վստահելի աղբյուրը

«Չվճարված վարչական իրավախախտումների համար սահմանված տուգանքների համաներման մասին կառավարության առաջարկը լավն է, որևէ մեկը չի կարող վիճարկել, բայց հարցեր է առաջացնում»,- այս մասին ԱԺ-ում «Մի շարք վարչական իրավախախտումների համար կիրառված տուգանքների համաներման մասին» օրենքի նախագծի քննարկման ժամանակ ասաց ԱԺ փոխնախագահ, արդարադատության նախկին նախարար Արփինե Հովհաննիսյանը:

«Մի շարք հարցեր են առաջանում հատկապես գումարի հետ կապված: Ես 2013թ.-ի ակտ եմ ստացել, վճարել, երբ կառավարությունը հայտարարել է համաներման մասին: Մարդիկ են եղել, որոնք վճարել են: Որևէ մեկը չի կարող վիճարկել, լավ բան է: Եթե 2016, 2017թթ.-ին սոցիալական բաղադրիչն ավելի շատ է, չվճարելու սոցիալական պատճառները շատ են, նրանք, ովքեր վճարե՞լ են, կարողացել են վճարել, անարդարությանը չե՞ն բախվում: Մենք քննարկել ենք այն հարցը, որ բարեխիղճ քաղաքացիները փոխհատուցում ստանան կամ գումարներ վերադարձվեն»,- ասաց Արփինե Հովհաննիսյանը:

Նա հիշեցրեց, որ մինչև 2012թ.-ը բոլոր տույժ և տուգանքները ներվել են, և սա առաջին դեպքը չէ համաներման:

Մտքերի փոխանակման ժամանակ ԱԺ ՀՀԿ խմբակցության պատգամավոր Միհրան Պողոսյանն ասաց, որ ասպիսի գործառույթ երրորդ անգամ է անցկացվում:

«2010-ից ԴԱՀԿ-ում վարչական իրավախախտումների մասին ռեգիստր է վարվում, հստակ երևում է, թե վարորդների որ մասն է վճարել, որ մասը ոչ, ինչի չի վճարվել և այլն: Այդ տեղեկատվությունը ԴԱՀԿ-ից կարող եք ստանալ մի հանձնարարականով»,- նշեց Պողոսյանը:

Նրա խոսքով՝ ամեն անգամ համաներումներից հետո բարեխիղճ վարորդների քանակը պակասում է, մարդիկ սպասում են, որ նմանատիպ գործառույթ կրկին կիրականացվի. «Սա լուրջ խնդիր է լինելու պետության համար: Ես դեմ չեմ համաներմանը, բայց նրանք, ովքեր ժամանակին վճարել են տուգանքները, ի՞նչ պետք է անեն, մարդը, որ բարեխիղճ է, չպետք է տուժի: Մենք բարեխիղճ վարորդներին գցում ենք ծուղակը, սա նրանց հետագայում դարձնում է ոչ բարեխիղճ վարորդներ»։