Ձեր վստահելի աղբյուրը

Երևանի քաղապետ Տարոն Մարգարյանի հրաժարականից հետո քաղաքագլխի պաշտոնը շարունակում է թափուր մնալ, սակայն դատելով վերջին զարգացումներից՝ այդ պաշտոնին հավակնողների պակաս չի զգացվի։

Շաբաթներ առաջ խոսակցություններ էին շրջանառվում, որ Երևանի քաղաքապետի աթոռին հավակնում է «Քաղաքացիական պայմանագիր» կուսակցության անդամ, այժմ արդեն ԱԺ պատգամավոր Ալեն Սիմոնյանը։ Վերջինս նույնիսկ  դիմում էր ներկայացրել Ազգային ժողովի նախագահ Արա Բաբլոյանին՝ որպես պատգամավոր իր լիազորությունները դադարեցնելու վերաբերյալ։

Այժմ էլ մամուլում տեղեկություններ են շրջանառվում, որ Երևանի ավագանու «Ելք» խմբակցությունը քաղաքապետի թեկնածուի համար քննարկվում է խմբակցության քարտուղար Թեհմինա Վարդանյանի թեկնածության հարցը, ով, փաստորեն, Երևանի պատմության մեջ առաջին կին քաղաքապետը կարող է  դառնալ։

Ճշտելու՝ համապատասխանում են արդյոք այս խոսակցություններն իրականությանը և պատրաստվո՞ւմ են առհասարակ ավագանու խմբակցությունները քաղաքապետի թեկնածուներ առաջադրել, Panorama.am-ի թղթակիցը զրուցեց խմբակցությունները ներկայացնող քաղաքական ուժերի ներկայացուցիչների հետ։

«Ծառուկյան դաշիքն» խմբակցության պատգամավոր Նաիրա Զոհրաբյանը մեզ հետ զրույցում նախ հիշեցրեց, որ Երևանի մասին օրենքը մի քանի հստակ իրավական լուծումներ է նախանշում։

«Լուծում առաջին. քաղաքապետի հրաժարականից հետո եռօրյա ժամկետում ավագանին իր կազմից կառաջադրի և կընտրի նոր քաղաքապետ։ Այդ դեպքում արտահերթ ընտրությունների մասին խոսելն ավելորդ կլինի։ Եվ մնացյալ լուծումները. եթե քաղաքապետ չընտրվի, ենթադրում եմ՝ մյուս լուծումը կլինի Երևանի ավագանու արտահերթ ընտրությունը։

Այն, որ արտահերթ ընտրության դեպքում «Բարգավաճ Հայաստան» կուսակցությունը անպայմանորեն կմասնակցի Երևանի ավագանու ընտրություններին, միանշանակ է»,- ընդգծեց Զոհրաբյանը՝ միաժամանակ հավելելով, որ այս պահին դեռևս որոշված չէ՝ ԲՀԿ համամասնական ցուցակն ով է գլխավորելու։

«Ցուցակը մենք չենք քննարկել այն պարզ պատճառով, որովհետև դեռևս հստակ չէ՝ գնալու ենք արտահե՞րթ ընտրությունների, թե ավագանի իր կազմից կարողանալու է ընտրել քաղաքապետ։ Իմ անձնական տպավորությամբ՝ մենք գնալու ենք արտահերթ ընտրության։ Թե ով կգլխավորի ԲՀԿ-ի համամասնական ցուցակը, ներկուսակցական քննարկումների համար մենք ժամանակ ունենք։ Առաջիկայում դա պարզ կլինի»,- նշեց Նաիրա Զոհրաբյանը։

Երևանի ավագանու «Ելք» խմբակցության անդամ Անի Սամսոնյանն էլ մեզ հետ զրույցում հայտնեց, որ թեկնածուի հարցով քննարկումներ իրենց մոտ դեռևս չեն եղել։

«Երկու օրից պետք է արտահերթ նիստ գումարվի, մեկ ամսվա ընթացում պետք է տեղի ուենան Երևանի քաղաքապետի արտահերթ ընտրություններ։ Ավագանին պետք է ընտրի նոր քաղաքապետ խմբակցությունների առաջադրումներից։ Յուրաքանչյուր խմբակցություն իրավունք ունի առաջադրելու քաղաքապետի իր թեկնածուին։ Եթե առաջադրում չեղավ կամ թեկնածուն բավարար ձայներ չհավաքեց, կառավարությունը կրճատում է ավագանու լիազորությունները, և նշանակվում են նոր արտահերթ ընտրություններ»,- ասաց նա։

Իսկ հնարավոր համարո՞ւմ  է, որ իր քաղաքական ուժը Երևանի քաղաքապետի թեկնածու առաջադրի, հետաքրքրվեցինք Անի Սամսոնյանից։

Վերջինս նշեց, որ եթե ավագանու մյուս խմբակցություններն առաջադրումներ կատարեն, իրենք ևս կառաջադրեն իրենց թեկնածուին։

«Երկիր Ծիրանի» խմբակցության ղեկավար Զարուհի Փոստանջյանը հրաժարվեց թեմայի շուրջ որևէ մեկնաբանություն տալ՝ հորդորելով հետևել հինգշաբթի օրը կայանալիք ավագանու արտահերթ նիստին, ինչից հետո էլ ընթացակարգը պարզ կլինի։