Ձեր վստահելի աղբյուրը

«Ողջունելի նախաձեռնություն է, բայց եթե մի բան ենք անում, եկեք լավ անենք»,- խորհրդարանի արտահերթ նիստում «Մի շարք վարչական իրավախախտումների համար կիրառված տուգանքների համաներման մասին» օրինագծի առաջին ընթերցմամբ քննարկման ժամանակ ասաց ՀՀԿ խմբակցության պատգամավոր Ռուստամ Մախմուդյանը։

Նրա կարծիքով՝ նախագիծը արտահերթ նիստով օրակարգ բերելը ժամանակավրեպ է, հարցեր կան, որոնց պատասխանները չկան։

«Ի՞նչ չափորոշիչներից ելնելով են որոշվել բացառությունները, որոնց վրա համաներումը չի կիրառվում: Ի՞նչ չափորոշիչով է որոշվել, որ ԱՊՊԱ կտրոն չկպցնելու համար տուգանքի համաներում չպետք է տալ, բայց 200 կմ արագություն գերազանցած վարորդին համաներում տալ: Ո՞րն է դրա արդարությունը»,- ասաց Մախմուդյանը՝ կոչ անելով վիճակագրական տվյալներով առաջնորդվել, ուսումնասիրել, թե որքանն են անհուսալի:

«Համաներումը սոցիալական թեթևության պետք է հանգեցնի»,- հավելեց ՀՀԿ-ական պատգամավորը:

«Ծառուկյան» խմբակցության պատգամավոր Գևորգ Պետրոսյանն էլ իր ելույթում ասաց. «Մտածեք ընդհանրապես այս չարաբաստիկ կարմիր գծերից ազատելու մասին։ Մեր երկրում իսկապես տուգանքները համահունչ չեն մեր բնակչության կենսամակարդակին։ Կառավարությունը պետք է հիմնովին վերանայի տուգանելու քաղաքականությունը»։

ՀՀԿ-ական պատգամավոր Կորյուն Նահապետյանն էլ նշեց, որ պետք է ընդունել այն փաստը, որ համաներումը մարդասիրական ակտ է, բայց դա բոլոր դեպքերում պետք է լինի հնարավորինս հիմնավոր։