Ձեր վստահելի աղբյուրը

Ամբերդի հոգևոր տեսուչ Խաչիկ դպիրը ֆեյսբուքյան իր էջում գրել է, որ նախօրեին իրեն են փոխանցել ՀՀ մշակույթի նախարարություն «Պատմամշակութային արգելոց-թանգարանների և պատմական միջավայրի պահպանության ծառայություն» ՊՈԱԿ-ի  տնօրեն Արա Թարվերդյանի խոսքը, որի համաձայն՝ իրեն արգելվել է Ամբերդի Ս. Աստվածածին եկեղեցում իրականացնել հոգևոր ծառայություն։

«Էսօր հուշարձանների ծառայության ՊՈԱԿ-ի տնօրեն Թարվերդյանի բանավոր խոսքի համաձայն, որն ինձ փոխանցեց իր աշխատակիցը, ինձ արգելվել ա Ամբերդի Ս. Աստվածածին եկեղեցում իրականացնել հոգևոր ծառայություն (մոմավաճառությունից մինչև Ս. Պատարագների մատուցում):

Բացատրությունը մոտավոր կայանում է հետևյալում, քանի որ ամրոցն ունի արգելոցի կարգավիճակ, այդ պատճառով չենք կարող իրականացնել հոգևոր գործառույթներ: Ուզում եմ հստակ ամրագրել մի կարևոր փաստ: Այս հուշարձան ամրոցի եկեղեցին սիրված սրբավայր է: Հայաստանի տարբեր վայրերից ուխտի են գալիս մարդիկ, որոնք գալիս են հենց միայն եկեղեցու համար: Հաճախ Երևանից մարդիկ ոտքով գալիս են սրբավայր իրենց աղոթքը, Ս. Պատարագը մատուցելու Տիրոջը: Դեմ գնալ ժողովորդի հոգևոր ապրումներին ու զգացումներին կբերի շատ բարդ հետևանքների: Դիմում եմ պատկան բոլոր մարմիններին, վերանայելու իրենց որշումն այս հարցում: Սիրով և աղոթքով Ամբերդի հոգևոր տեսուչ Խաչիկ դպիր:

Հ. Գ. Պատկան մարմիններին խորհուրդ կտամ, այցելեն Ամբերդ ու տեղում ծանոթանան Ամբերդի «ռեմոնտին» այլանդակ շինարարությանն ու շինարարական ծավալների խաբեությանը: Առայժմ այսքանը: Ամեն ինչ փաստերով պահված է»,- գրել է Ամբերդի հոգևոր տեսուչ Խաչիկ դպիրը:

Ամբերդի հոգևոր տեսուչ Խաչիկ դպիրի գրառմանն արձագանքել է մշակույթի նախարարի տեղակալ Տիգրան Գալստյանը, ով հայտնել է, որ հեռախոսով զրույցել է Խաչիկ Վարդանյանի հետ, կհանդպեն, Ա. Թարվերդյանից պարզաբանում կպահանջի:

«Խնդիրը լուծում կստանա՝ մի՛ անհանգստացեք»,- գրել է փոխնախարարը:

Panorama.am-ը փորձեց «Պատմամշակութային արգելոց-թանգարանների և պատմական միջավայրի պահպանության ծառայություն» ՊՈԱԿ-ից պարզել, թե ինչու է Խաչիկ դպիրին արգելվում Ամբերդի Ս. Աստվածածին եկեղեցում իրականացնել հոգևոր ծառայություն։ ՊՈԱԿ-ը հնարավոր  է ավելի ուշ հանդես գա մեկնաբանությամբ։