Ձեր վստահելի աղբյուրը

«ՆորՖոլկ Քոնսալթինգ» ընկերությունը լուծարման գործընթացում է: Այս մասին այսօր լրագրողների հետ հանդիպման ժամանակ ասաց Պետական եկամուտների կոմիտեի նախագահ Դավիթ Անանյանը:

«Հաջորդ շաբաթ ընկերության լուծարման ակտը կավարտենք ու մինչև ամսվա վերջ ընկերությունն ամբողջությամբ կլուծարվի»,- ասաց ՊԵԿ նախագահը՝  հավելելով, որ մինչ լուծարման գործընթացի ավարտը  ընկերությունը որոշակի ճշգրտումներով շարունակում է աշխատել՝ ՊԵԿ ներքին անվտանգության աշխատակիցների անմիջական հսկողության ներքո։

Դավիթ Անանյանը հայտնեց՝ կառավարությանն առաջարկել են, որ այն լինի պետական մասնակցությամբ բաժնետիրական ընկերություն, բայց այն ոչ թե ամբողջությամբ կրկնելու է այն գործունեությունը, ինչ «Նորֆոլկն» է իրականացրել, այլ պետք է հանդիսանա մաքսային միջնորդային ծառայություններ իրականացնող:

«Խնդիրն այն է, որ այսօր մանր ու միջին ձեռներեցությամբ զբաղվողները պատրաստ չեն ամբողջությամբ իրենք պատասխանատվություն կրել, գալ ու մաքսային ձևակերպումներ իրականացնել: Մենք պետք է աստիճանաբար ձևավորենք այնպիսի մշակույթ, որ բոլոր ապրանքները մաքսազերծվեն ըստ տեսականու»,- ընդգծեց նա:

Դավիթ Անանյանը նշեց, որ  «Նորֆոլկ» ընկերության դեմ հարուցված քրեական գործը կկարճվի, եթե պետությանը պատճառված վնասն ամբողջությամբ վերականգնվի։ Ըստ նրա՝ ընկերությունը մինչև հուլիսի 20-ը կարող է վերականգնել պետությանը հասցված վնասը, որը կազմում է 7 մլն դոլար:

«Դրա մի մասն արդեն վերականգնվել է, 5 մլն դոլարն ընկերությունը կվերականգնի մինչև հուլիսի 20-ը»,- նշեց նա՝ միաժամանակ հավելելով, որ «ՆորՖոլք» ընկերության սեփականատեր Արմեն Ունանյանն այսօր իր պարտականությունները կատարում է ներքին անվտանգության աշխատակիցների հսկողությամբ։