Ձեր վստահելի աղբյուրը

Օրեր առաջ «Սիվիլնեթ»-ին տված հարցազրույցում առաջին փոխվարչապետ Արարատ Միրզոյանի մամուլի խոսնակ Կարպիս Փաշոյանը, խոսելով Ապրիլյան պատերազմում զոհված տղաների դեմքերը ԵՊՀ պատերին նկարելու մասին, մասնավորապես  հայտարարել է.  «Ինձ թվում է այդ երեխաներին պետք է հանգիստ թողնել: Նույն Ռոբերտ Աբաջյանի անունը շատ են շահարկում, նրանց պետք է թողնել հանգիստ: Մանկահասակ դեմքով տղա, երևի էդ պահին չի էլ հասկացել, թե ինչ է կատարվում… և հիմա մենք անընդհատ շահարկում ենք այդ անունը: Ինձ թվում է՝ չարժի: Ընդամենը 18 տարեկան տղա… Ինձ թվում է չպետք է այդքան շահարկել անունները»:

Հայտարարությունը հարուցել է ֆեյսբուքյան օգտատերերի զարմանքը, զայրույթը, մտահոգությունը: Դրանց վերաբերյալ քննարկումներն ակտիվացել են երեկվանից, դրանց մեծ մասը խիստ քննադատության վերածվեց, երբ բացահայտեցին, որ նա ոչ միայն «ժիլետավոր պատմաբան է», այլ առաջին փոխվարչապետի խոսնակ:

Մինչ այս պահը ոչ առաջին փոխվարչապետը, ոչ նրա գրասենյակը, ներողություն կամ ափսոսանք, զղջում չեն հայտնել, պարզաբանում չեն ներկայացրել: Քիչ առաջ Փաշոյանը գրեց, որ իր մտքերը «ինչ-որ մարդիկ կոնտեքստից կտրել ու սխալ են մեկնաբանում: Չգիտեմ, թե ինչու են այդպես անում, միգուցե սա մանիպուլյացիա է»:

Նա բացատրել է նաև, թե ինչու է գրում. «Ես երբեք այսպիսի մեկնաբանությամբ հանդես չէի գա, բայց նկատի ունենալով այն փաստը, որ ինչ-որ մարդկանց շահարկումներից ելնելով զինվորների ընտանիքի անդամները կարող են սխալ ընկալել արտաբերված մտքերը, ստիպված հանդես եմ գալիս այս հայտարարությամբ»: 

Ինչևէ, վերևում Panorama.am-ը բառացի է մեջբերել Փաշոյանի խոսքերը: Իսկ նրա «մեղայական»-ն այնքան էլ միանաշնակ չընդունվեց: Մեկնաբանություններ արած քաղաքացիները հիշեցրեցին, որ նա արդեն կառավարության ներկայացուցիչ է, պետք է պատրաստ լինի քննադատություններ ընդունել, ոչ թե դրանք քաղաքական պատվեր որակել: Նրանք ամեն դեպքում պահանջում են ներողություն խնդրել արդարանալու փոխարեն:

Ֆեյսբուքյան ակտիվ օգտատերերից Զոհրաբ Եգանյանը, ով նախկինում եղել է Գյումրու քաղաքապետի, ԿԳ նախարարի, ՄԻՊ-ի, Գեղարքունիքի մարզպետի մամուլի խոսնակը, ֆեյսբուքյան իր էջում   նկատել է. «Մամուլի խոսնակը պետք է զուսպ լինի, գործի մեջ միշտ հիշի, որ ինքը ներկայացնում է իր ղեկավարին ու կառույց, իսկ երբ սկանդալի մեջ է հայտնվում, իր ղեկավարին է դնում վատ վիճակի մեջ: Սա Կարպիսի մասին, ով անհասկանալի ու անընդունելի ձևակերպումներ էր օգտագործել Ռոբերտ Աբաջյանի մասին խոսելիս, իսկ ընդհանրապես, տղեք ջան խոսելը, տեսակետ պնդելն ու կիքսեր չտալը փորձ ու գիտելիք է պահանջում, երբ միանգամից վերևում եք հայտնվում, մի քիչ սկզբնական շրջանում զուսպ լինելն ու փորձառուների հետ խորհրդակցելը չէր խանգարի:
Հ.Գ երկու օր Արցախում էի, Ռոբերտի, Քյարամի ու մյուս տղեքի արածով է, որ այլևս դուխը միլիոն է զորքի»:

Ֆեյսբուքյան քննարկումներից մեկում մեկնաբանություն է թողել նաև Ապրիլյան պատերազմում զոհված գյումրեցի տանկիստ Տիգրան Աբգարյանի եղբայրը՝ Ժորա Աբգարյանը.  «Արդեն էնքան բան կա ասելու, մարդ չգիտի՝  որտեղից սկսի...գժանոց դարձավ արդեն...էտ գիտեն լավ գործ ունեցան,  իրանք են,  որ կա՞ն, հլը խաբար չեն՝ մեր նման տղերք կան, երբ ում, ինչ ուզենան, կանեն, մենակ Հայրենիքի ու Հերոսների Պատիվը բարձր պահենք.. ավելի լավ է  ներողություն խնդրի քանի շուտ է»:

«Մեդիալաբ»-ին ավելի վաղ դեռ այն ժամանակ պատմության ուսուցիչ Կարպիս Փաշոյանը կարծիք էր հայտնել է, որ Ապրիլյան պատերազմի իրադարձություններն ընդհանրապես իրավունք չունեն այս փուլում ներառելու դպրոցական դասագրքում, որովհետև այդ իրադարձությունները դեռ պատմություն չեն:

Սա էլ իհարկե, ուշագրավ դիտարկում է, հաշվի առնելով, որ մշակույթի նախարարությունը մի քանի ամիս առաջ տեղի ունեցած իշխանափոխության լուսանկարների ցուցասրահ է պատրաստվում բացել՝ Պատմության թանգարանում: Գուցե առաջին փոխվարչապետի մամուլի խոսնակը փոխել է դիրքորոշումը, կամ էլ նրա ձայնը լսող չի եղել: