Ձեր վստահելի աղբյուրը

Գնահատման և թեստավորման կենտրոնն ամփոփել է միասնական քննությունների արդյունքները, այսօր արդեն բուհերին կտրամադրվեն ընդունված դիմորդների անվանացանկերը: Այս մասին այսօր լրագրողների հետ հանդիպման ժամանակ ասաց Գնահատման և թեստավորման կենտրոնի տնօրենի ժամանակավոր պաշտոնակատար Արմեն Փաշայանը:

Նրա խոսքով, ընդհանուր առմամբ, այս տարի միասնական քննությանը մասնակցել է 5087 դիմորդ,  քննությունները կազմակերպվել են 15 քննական կենտրոնում, որից 4-ը Երևանում, մնացածը՝ մարզերում: «Քննություններն ընթացել են հանգիստ մթնոլորտում, կազմակերպչական առումով որևէ խնդիր չենք ունեցել»,- ասաց Փաշայանը:

ԳԹԿ տնօրենի ժամանակավոր պաշտոնակատարը նշեց, որ քննությունների առաջին փուլում դիմորդներից 1125-ը չի հաղթահարել դրական միավորի անցողիկ շեմը, իսկ  327-ը ստացել է 20 միավոր: Երկրորդ փուլում 747 դիմորդից 357-ը չի հաղթահարել դրական միավորի շեմը: Օրինակ, ըստ Արմեն Փաշայանի, երկրորդ փուլում ռուսաց լեզվի միասնական քննությունից անբավարար է ստացել դիմորդների  51 տոկոսը, ֆիզիկայից՝ 61 տոկոսը:

Ընդհանուր առմամբ, միջին գնահատականը բոլոր առարկաների մասով պահպանվել է 12-14 միավոր:

Արմեն Փաշայանի խոսքով՝ այս տարի ևս  իրավագիտություն, տնտեսագիտություն մասնագիտությունները շարունակում են մնալ ամենապահանջվածը, ավելացել է նաև ինֆորմատիկայի և կիրառական մաթեմատիկայի մասնագիտություններով դիմորդների թիվը:
Սակայն այս տարի ֆակուլտետներ կան, որ ընդհանրապես ուսանող չեն ունենա:

Մասնավորապես, Մանկավարժական, Բրյուսովի, Շիրակի, Գավառի պետական համալսարաններում և Սլավոնական համալսարանի 29 մասագիտությունների գծով ուսանողներ չեն լինի:

«Օրինակ, Մանկավարժականի «Բնագիտություն», «Թարգմանչական գործ», «Լրագրություն», «Միջմշակութային հաղորդակցություն», «Սուրդոմանկավարժություն» բաժիններում այս տարի ոչ մի դիմորդ չի ընդունվել»,- ասաց ԳԹԿ-ի տնօրենի պաշտոնակատարը:

Արմեն Փաշայանը նաև հայտնեց, որ նախորդ տարվա համեմատ այս տարի դիմորդների թիվը նվազել է: Եթե 2018 թ-ի միասնական քննությանը մասնակցել է 5087 դիմորդ, ապա  2017թ-ին՝ 10 հազար դիմորդ:  Դիմորդների թվի նվազումն, ըստ նրա, պայմանավորված է 12-ամյա կրթական համակարգի անցնելու գործոնով:

«Մենք այլևս չենք ունենա նման անկում, քանի որ հաջորդ տարի ավագ կունենանք շուրջ 24 հազար շրջանավարտ և, ակնկալում ենք, որ դիմողների թիվը կկազմի 11-12 հազար»,- ասաց նա: