Ձեր վստահելի աղբյուրը

Երևանի ավագանու «Երկիր Ծիրանի» խմբակցության ղեկավար Զարուհի Փոստանջյանը մտադիր է ավագանու արտահերթ ընտրություններում Երևանի քաղաքապետի պաշտոնում առաջադրել  իր թեկնածությունը: Այս մասին նա հայտարարեց այսօր՝ լրագրողների հետ զրույցում:

«Այս պահին Երևանի քաղաքապետարանն ազատված է ՀՀԿ-ից, բայց առջևում դեռ պայքար ունենք տանելու: Ես, որպես Երևանի քաղաքապետի թեկնածու, առաջադրվելու եմ ավագանու ընտրություններին: Այդ ընտրություններից հետո մենք կառուցելու ենք մեր Երևանը, վերացնելու ենք աղտոտված վիճակը: Երևանը պետք է ծառայի մեր քաղաքացիներին: Երևանի ավագանու ընտրությունները պետք է տեղի ունենան նախկին՝ մինչև համահայկական ընդվզումը գործած օրենսդրության պայմաններում:

Մենք գնում ենք համապետական ընտրությունների, որոնց թափանցիկ, արդար անցկացման դեպքում կարող ենք ասել՝ համահայկական մեծ ընդվզումը արդյունքներ է արձանագրել: Բայց եթե ընտրությունները կայանան այնպես, ինչպես 2017 թվականին, կարող ենք ասել, որ երկրում ոչ մի բան չի փոխվել, և ավտորիտարիզմը շարունակում է գործել Հայաստանում»- ասաց Փոստանջյանը:

Երևանի ավագանու «Երկիր Ծիրանի» խմբակցության ղեկավարի խոսքով, ամեն բան կախված է լինելու երևանցիների քաղաքացիական դիրքորոշումից:

«Այս պահին էլ մենք վիճարկում ենք այս ավագանու ընտրական կարգը: Շուրջ մեկ տարի առաջ Տարոն Մարգարյանի շտաբում մենք ընտրակեղծարարություն բացահայտեցինք, որին սակայն ընթացք չտրվեց: Ավելին՝ մեր նկատմամբ բռնություն  կիրառվեց: Ինձ երևանցիները պետք է ընտրեն, նրանց կամքը և ցանկությունն է քննարկվում: Սա արտահերթ գործընթաց է, հետևաբար ամեն ինչ լուծվում է արտահերթ ընթացակարգերով: Մենք մասնակից ենք լինելու այդ բոլոր գործընթացներից: Այսօրվանից մենք ցույց ենք տալիս մեր քաղաքական դիրքորոշումը և ասում, որ մենք փոխելու ենք ամեն ինչ»,- ասաց քաղաքապետի թեկնածուն:

Անդրադառնալով ավագանու նիստերը բոյկոտելու ՀՀԿ-ի պրակտիկային՝ Փոստանջյանն ասաց .  «Իրենց հարցրեք՝ ինչու չեն եկել: Հանրապետական կուսակցության անդամներն ինչպես միշտ են եղել դասալիք, այսօր էլ նույնպես դասալիքի կարգավիճակում են, չեն եկել նիստին, թեպետ հենց իրենք էին քվեարկում, որ նիստն այսօր անցկացվի»:

Նա նշեց, որ մեկ տարի առաջ ստանձնած իրենց առաքելությունը՝ գրավել քաղաքապետարանը, մաքրել քաղաքապետարանը աղբից, կեղտից և կոռուպցիայից, մասամբ իրականացրել են: «Ինչպես և խոստացել էինք՝ Տարոն Մարգարյանի կյանքը վերածել դժոխքի, այդ խոսոտւմը նույնպես մենք փորձել ենք կատարել, և կարծում եմ՝ դա մեզ հաջողվել է:

Ավելի ուշ Երևանի փոխքաղաքապետ Կամո Արեյանը հայտարարեց, որ երեսուն րոպե տևած ընդմիջումնից հետո քվորում չապահովելու պատճառով ավագանու նիստը չի կայանում: Նիստին ներկա էր ավագանու ընդամենը 5 անդամ: