Ձեր վստահելի աղբյուրը

Վարչապետ Նիկոլ Փաշինյանը  ֆեյսբուքյան ուղիղ հեռարձակման միջոցով անդրադառնալով  «Սանիթեք» և «Վեոլիա ջուր» ընկերությունների գործունեությանը՝ նշել է , որ դրանց գործունեությունից այդքան էլ գոհ չեն:

Նշենք, որ վարչապետին ուղղված հարցերի մի մասը վերաբերել են ջրամատակարարման, աղբահանության խնդիրներին:

Անդրադառնալով  «Վեոլիա ջուր » ընկերությանը՝ Նիկոլ Փաշինյանն ասաց, որ  ջրամատակարարման թեմայով մի քանի անգամ զբաղվելու առիթ ունեցել է և մի քանի անգամ ահազանգերի հիման վրա հանձնարարական է տվել տարածքային կառավարման և զարգացման նախարարությանը, որ զբաղվեն այդ խնդրով:

«Տեղյակ եմ, որ Երևանում և մարզերում ջրամատակարարման լուրջ խնդիրներ կան: «Վեոլիա ջուրը» փորձում է հավաստիացնել, որ այդ խնդիրները, մասնավորապես, Երևանում հաղթահարվել են, բայց ես տեղյակ եմ, որ այդպես չէ: Վերջերս ես հանդիպում ունեցա ընկերության տարածաշրջանային տնօրենի հետ, անկեղծ ասած, բավականին լուրջ խոսակցություն տեղի ունեցավ, և ես ասացի, որ բազմաթիվ վերապահումներ ունենք իրենց գործունեության վերաբերյալ, և հույս եմ հայտնել, որ ընկերությունը լրջորեն կվերանայի իր գործելակերպը ՀՀ-ում»,- նշեց  վարչապետը:

Նիկոլ Փաշինյանի խոսքով, տարբեր գնահատականներով խմելու ջրի կորուստը 60-70 տոկոս է կազմում, ինչը երբեմն փորձում են պայմանավորել վատ վիճակում գտնվող ջրահամակարգի հետ, սակայն, ըստ  վարչապետի, ինքն ուզում է համաձայնել շրջանառվող այն տեսակետի հետ, որ  այստեղ կոռուպցիոն ռիսկեր կան:

«Վերջին շրջանի խնդիրները «Վեոլիա ջուրը» կապում է սաստիկ շոգերի հետ, պոմպի վթարի հետ, սակայն հուլիսին շոգ է լինելու, ձմեռն էլ՝  ցուրտ, ուստի պետք է նախապատրաստվել դրան»,- ասաց վարչապետը:

Խոսելով ջրի որակից, Նիկոլ Փաշինյանը նշեց, որ ընկերությունը հավաստիացնում է՝ բնակիչներին մատակարարվող ջուրը  ստանդարտի մեջ է, բայց , ըստ վարչապետի, պետք է արձանագրել, որ այստեղ ևս թե ընկերությունը, թե կառավարության համապատասխան մարմինները լրջորեն աշխատելու տեղ ունեն:

Ինչ վերաբերում է աղբահանությանը, Նիկոլ Փաշինյանն ասաց, որ ինքը նույնպես մայրաքաղաքի փոողոցներում տեսնում է լեփ-լեցուն աղբամաններ և որոշ հանձնարարականներ է տվել աղբահավաքման թեմաներով, քանի որ Երևանում աղբահավաքումը պատշաճ   չի կազմակերպվում: «Սրանք լուրջ խնդիրներ են, և «Սանիտեք»,և «Վեոլիա ջուր» ընկերությունները պետք է այս ուղերձները հստակ ստանան, որ մեղմ ասած, մենք այդքան էլ գոհ չենք իրենց  գործունեությունից: Մեր քաղաքացիների իրավունքները պետք է լրջորեն պաշտպանվեն:  Քաղաքացիների բողոքները համարում եմ արդարացի և այդ բողոքները կոնկրետ պատասխաններ պետք է ստանան: Իմ համոզմամբ՝  այս ամենը վատ կառավարման, երբեմն կոռուպցիոն ռիսկերի հետևանք են»,- ասաց վարչապետը: