Ձեր վստահելի աղբյուրը

«Ընտրակարգի հետ կապված մեր մոտեցումը բոլորին հայտնի է՝ կողմ ենք բաց համամասնական ցուցակով ընտրությունների անցկացմանը: Այս փուլում կարևոր է համեմատություն անցկացնել, քանի որ աշխարհում իդեալական մոդել չկա, ավելին՝ յուրաքանչյուր մոդել ինչ-որ խոցելի տեղ ունի»,- ԸՕ բարեփոխումների շուրջ խորհդարանական քննարկման ժամանակ այսօր  ասաց ՀՅԴ խմբակցության ղեկավար Արմեն Ռուստամյանը:

«Մեր առաջարկած մոդելը՝ ընտրության գնալ բաց ցուցակով, հիմնական խնդիրն այն է, թե ինչպես են բաշխվում մանդատները կուսակցության ներսում: Բնականաբար բոլոր դեպքերում գործ ունենք համամասնական կարգի հետ, որն ասում է, թե կուսակցությունները համամասնորեն ներկայացված են ԱԺ-ում։

Բայց հարց է առաջանում, թե ինչպես են կուսակցության ձայները, վերածվելով  մանդատների, բաշխվում կուսկացության ցուցակի մեջ: Այս առումով մեր առաջարկած մոդելի ամենամեծ առավելությունն այն է, որ սա անում է ժողովուրդը, այսինքն՝ ոչ միայն ձայն է տալիս կուսակցությանը, այլև ասում է, թե ինչպես կուսակցությունը պետք է բաշխի ձայները»,- ասաց Ռուստամյանը:

Դաշնակցական գործչի համոզմամբ, խնդիր կա նաև կուսակցությունների ներսում ժողովրդավարության հաստատման հարցում: Ռուստամյանի գնահատմամբ՝ ՀՀ-ում կուսակցական համակարգը դեռևս կայացած չէ:

«Այս խնդիրը լուծելու լավագույն ձևերից մեկը ժողովրդի մասնակցությամբ կատարելն է, ժողովրդավարությունը հենց դա է»,- ասաց Արմեն Ռուստամյանը։

Վերջում Արմեն Ռուստամյանը հռետորական հարցադրում կատարեց՝ ո՞վ է որոշել, որ իրավունք ունի ժողովրդին ինչ-որ քվոտաներ պարտադրել։

«Քվոտաներն ինքնին ժողովրդավարության հետ աղերս չունեն»,- ասաց նա։