Ձեր վստահելի աղբյուրը

«Ելք» դաշինքն առաջիկա երկու շաբաթների ընթացքում որոշում կկայացնի՝ Երևանի քաղաքապետի ընտրություններում հանդես կգա մեկ միասնական թեկնածուով, թե դաշինքի անդամ կուսակցություններից յուրաքանչյուրը կառաջադրի առանձին թեկնածու: ԱԺ-ում այսօր լրագրողների հետ զրույցում ասաց խմբակցության պատգամավոր Էդմոն Մարուքյանը՝ հավելելով, որ ինքն ավելի շատ հակված է միասնական թեկնածու առաջադրելու գաղափարին։

«Դեռևս քննարկումներ չենք ունեցել, քանի որ երեկ է եղել չկայացած նիստը, պետք է սպասել այն որոշմանը, որ կառավարությունը կրճատի ավագանու լիազորությունների ժամկետը։ Մինչ այդ, բնականաբար կլինեն քննարկումներ, թե ինչպես մասնակցենք»,- նշեց նա։

Մարուքյանը միաժամանակ շեշտեց՝ եթե միասնական թեկնածու առաջադրելու որոշում չկայացվի, «Լուսավոր Հայաստան» կուսակցությունն ընտրություններին կմասնակցի առանձին:

«Այո, միանշանակ, եթե չլինի ընդհանուր մասնակցություն, կլինի առանձին մասնակցություն մեր կողմից՝ բնականաբար հետագա համագործակցության տեսլականով»,- նշեց խորհրդարանականը՝ հավելելով, որ կոնկրետ իրենց կուսակցությունում հնարավոր թեկնածուների հարց չի քննարկվել:

Հարցին՝ արդյոք միասնական թեկնածուով հանդես գալը կախված է «Քաղաքացիական պայմանագրից» Էդմոն Մարուքյանը պատասխանեց. «Բոլորիցս էլ կախված է, քանի որ բոլորով պետք է գանք կոնսենսուսի, որոշում կայացնենք, թե ինչպես ենք մասնակցում»:

Էդմոն Մարուքյանը նաև տեղեկացրեց, որ խմբակցության  ղեկավարի հարց դեռևս չի քննարկվել, այդ հարցը ժամանակավորապես հետ է մղվել։