Ձեր վստահելի աղբյուրը

Շիրակի մարզի Փանիկ գյուղում պատահածից հետո  գյուղապետ Վարդան Մակեյանը դիմել է ԱԱԾ-ին ու ոստիկանությունը: 

Panorama.am-ի հետ զրույցում նա նշեց, որ ռուս զինվորականների կողմից կրակոցները տևել են 15 րոպե, ինչից հետո  զինվորականները՝ մոտ 30-40 մեքենայով տեղափոխվել են Արագածոտնի մարզի ուղղությամբ:

«Ոչ միայն երեխաները, այլ ամբողջ համայնքը  վախեցել էին: Անակնկալի էինք եկել: Առաջին անգամն է, որ նման բան է պատահում: Առանց զգուշացնելու զորավարժություն են անցկացրել համայնքի տարածքում, փակել են ճանապարհները»,-ասաց գյուղապետը:

Նա վիրավորական է համարում նման գործելակերպը: Կրակոցների ժամաակ գյուղապետն մոտեցել է զինվորականներին, նրան պատասխանել են՝ թե հերթական զորավարժությունն է:

«Ես հարցնում եմ՝ ով է թույլ տվել բնակավայրում զորավարժություն անցկացնել, պատասխանում են՝ այ դա մենք չգիտենք»,-նշեց գյուղապետը:

Նրա խոսքով, գյուղը նյութական վնասներ չի կրել, վնասը բարոյական է: Մակեյանը գիտի, որ հարցով հիմա զբաղվում են մարզպետանարը, ՊՆ-ն, վարչապետն է հանձնարարական տվել:

Հիշեցնենք, որ Շիրակի  մարզպետ Կարեն Սարուխանյանն այսօր հանդիպել է 102-րդ ռազմաբազայի անձնակազմի գծով հրամանատարի տեղակալ Ալեքսեյ Պոլյուխովիչին:  Մարզի ղեկավարը մտահոգություն է հայտնել տեղի ունեցածի առնչությամբ, նշելով, որ այսօրինակ բացթողում աշխատանքներում անթույլատրելի է, հատկապես, եթե անհանգստություն է պատճառվել համայնքի ազգաբնակչությանը:

Ալեքսեյ Պոլյուխովիչը ներողություն է խնդրել և նշել, որ միջադեպը անփութության արդյունք է: