Ձեր վստահելի աղբյուրը

«Մենք, իհարկե, հակված ենք գնալու առավելագույն կոնսենսուսի տարբերակով, որովհետև բոլորիս խնդիրը մեկն է՝ ունենալ մեկ միասնական, համաձայնեցված նախագիծ»,- այսօր ԸՕ բարեփոխումների շուրջ խորհրդարանական քննարկումների ժամանակ ասաց «Ծառուկյան դաշինք» խմբակցության պատգամավոր Նաիրա Զոհրաբյանը:

«Հանրապետական կուսակցության առաջարկած տարբերակի մեջ ինչ-որ մեսիջներ կան, սակայն նախագիծը բավական բարդեցված է: Ըստ էության, դա նույն քողարկված, նախորդ ռեյտինգային ընտրակարգն է՝ մի քիչ այլ մոդիֆիկացիայով»,- ասաց պատգամավորը:

Նա հայտնեց, որ իրենք  խմբակցությունում քննարկել են, և  Սերգեյ Բագրատյանը ներկայացրել է իրենց մոդելը, այն է ՝ գնալ  քվոտավորման ճանապարհով. «ինչպես գնում  ենք  ազգային փոքրամասնությունների, կանանց քվոտաների, այնպես էլ մարզային ներկայացուցիչները որոշակիորեն քվոտավորված ներկայացված լինեն: Համաձայն չե՞ք առաջարկած մոդելի հետ՝ գտնենք ուրիշ մոդել, բայց պետք է լինի մեկ համամասնական ցուցակ։ Երկու ցուցակը, միևնույն է, խճճված իրավիճակ է ստեղծելու»։

Զոհրաբյանը շեշտեց՝ «Ծառուկյան դաշինքը» երկար է քննարկել այս հարցը և պնդում է մեկ միասնական ցուցակի տարբերակը, իսկ ահա մարզերից ներկայացված թեկնածուների հարցը պետք է քննարկել:

«Մենք պատրաստ ենք փոխզիջման, կոնսենսուսի, բայց ոչ այս բարդացված եղանակներով: Մենք մի անգամ գնացինք Սան Մարինոյի մոդելով, հիմա էլ գերմանական մոդելով, եկե՛ք գտնենք այն մոդելը, որն աշխատելու է Հայաստանում, չբարդացնենք  մեր և առավել ևս ընտրողների կյանքը»,-ասաց պատգամավորը։

«Ծառուկյան դաշիքն» խմբակցության պատգամավոր Սերգեյ Բագրատյանն էլ նշեց, որ նշված տարբերակով հնարավոր չի լինելու ապահովել բոլոր թեկնածուների հավասար քարոզչության իրավունքը։