Ձեր վստահելի աղբյուրը

ՀՀ վերականգնվող էներգիա արտադրողների ասոցիացիան ահազանգում է՝ Ախուրյան  գետի ձախ ափին տեղակայված «ԱՐՍՏԵԴ», «ԼԱՅԹԷԿՈ» և «ՖԵՆՀԱԼ» ՍՊ ընկերությունների՝ համապատասխանաբար «Ամասիա» ՓՀԷԿ, «Փարոս» ՓՀԷԿ  և «Կասկադ» ՓՀԷԿ անվանումներով, իրավունքները խախտվում են:

«Այս ՓՀԷԿ-երը անցած 8-9 տարիների ընթացքում ձեռնամուխ են եղել այդ փոքր հիդրոկայանների  կառուցմանը՝ իրականացնելով մոտ  4 մլրդ ՀՀ դրամի ներդրում, որոնք կատարվել են հիմնականում ՓՀԷԿ-երի զարգացման ծրագրերին ուղղված վարկային միջոցների հաշվին, գրավադրվել սեփականատերերի ողջ ունեցվածքը, նույնիսկ բնակարանները: Սակայն կատարվածի արդյունքում պարզ է դարձել, որ կառուցված և կառուցման փուլերում գտնվող ՓՀԷԿ-երին այդպես էլ չի ընձեռնվում շահագործման հնարավորություն՝ անկախ լիցենզիայի և ջրօգտագործման թույլտվության իրավունքի տրամադրումից՝ կանգնեցնելով սեփականատերերին ողջ ունեցվածքը կորցնելու վտանգի առջև»,-խնդիրը ներկայացնում է ասոցիացիան:

Տարածած հայտարարության մեջ մասնավորապես նշվում է, որ «Ամասիա», «Կասկադ» և  «Փարոս»  ՓՀԷԿ-երն  ինչ-որ կերպ գումարներ հայթայթելով՝ փորձում են խուսափել տակավին ոչնչացումից՝ հույսեր փայփայելով նոր Կառավարությունից ձեռք մեկնելու և կանոնակարգելու ստեղծված իրավիճակը:

««Նոր Հայաստանում» չպետք է լինեն ներդրողների իրավունքները ոտնահարողներ, և իրապես իրավական պետություն և ժողովրդավարություն կերտելու համար պետք է առաջնորդվել և՛ օրենքով և՛ արդարությամբ...»,-հույս է հայտնում ասոցիացիան: