Ձեր վստահելի աղբյուրը

«Երանի քաղաքական ուժերն իրենց նախընտրական ծրագրերը պիտի կառուցեին` ելնելով իրենց առողջապահական, կրթական և այլ ծրագրերից, ունենային համապատասխան մարդիկ, ովքեր այդ գաղափարներն իրականացնելու են»,-ԱԺ-ում Ընտրական օրենսգրքի շուրջ քննարկումների ժամանակ այսօր ասաց ԱԺ ՀՅԴ խմբակցության պատգամավոր Սպարտակ Սեյրանյանը՝ անդրադառնալով ՀՀԿ-ական պատգամավոր Խոսրով Հարությունյանի այն առաջարկին, որ ընտրություններին մասնակցելու հայտ ներկայացրած ցանկացած ուժ նախապես պետք է ներկայացնի ապագա կառավարության կազմը։

ՀՅԴ-ական գործչի խոսքով, երբ ինչ-որ նախագիծ պարտադիր է դարձվում, լավ ցանկության իրականացման հնարավորությունը ինչ-որ իմաստով փչանում է:

Սեյրանյանը նշեց, որ, կիսելով հանդերձ Հարությունյանի բարի ցանկությունը, չի կիսում նրա լավատեսությունը:

«Եթե որակյալ բանավեճեր չլինեն, այդ կաբինետի հրապարակումը ոչինչ չի տալու: Ոլորտային նախարարների բանավեճեր պետք է կայանան: Եթե չկա առողջապահական հիմնախնդիրներով զբաղվող փորձագիտական լուրջ ներուժ, և մի թեկնածուն ասում է` ես լինելու եմ առողջապահության նախարար, և բոլոր վիրահատությունները լինելու են անվճար, մյուս նախարարը, ով հասկանում է, որ դա անհնար է, ասում է` դա հնարավոր չէ, հանրային ընկալման տեսակետից առաջինը կլինի շատ լավ նախարար, երկրորդը` շատ վատ նախարար: Հանրությունն ինչպե՞ս պետք է կողմնորոշվի»,- հարց հնչեցրեց պատգամավորը:

Սեյրանյանը հիշեցրեց, թե նախորդ ընտրություններում ովքեր են քվեներ ստացել: «Ժամանակին մարդիկ, ովքեր համոզված էին, որ ջերմուկով Հայաստանը կարելի է պահել, ստացան քվեներ: Քվեներ ստացան այն գործիչները, ովքեր բաժակաճառեր ասելու նման հայտարարում էին` կգանք իշխանության, թոշակը կդարձնենք այսքան: Մյուսը տեսավ, որ ժողովրդին դա դուր է  գալիս, ասաց` ես երեք անգամ կբարձրացնեմ: Այդ ժամանակ էլ չկար հեղինակավոր վերլուծական հանրույթը, որը կասեր` հարգելի ապագա սոցապ նախարարները երեքն էլ ստախոս ու ֆոկուսնիկ են»,- նշեց պատգամավորը:

Սպարտակ Սեյրանյանը չբացառեց, որ կառավարության կազմի մասին նախապես ծանուցելը մանիպուլյացիաների տեղիք տա։  «Այսինքն`  ես ընտրություն եմ կատարում` մտքում կաբինետներ ունենալով, և ստացվում է, որ ես ունեմ սպորտի նախարարի մի փայլուն թեկնածու, որևէ քաղաքական ուժ էլ ասում է`  Ջորկաեֆին կդարձնի սպորտի նախարար և դրանով կհավաքի այնպիսի մարդկանց քվե, ովքեր այս կուսակցության ո'չ ծրագրի, ո'չ գաղափարի հետ համաձայն չեն: Այսինքն` այստեղ կա քաղաքական մանիպուլյացիայի ու աճպարարության խնդիր»,- ասաց դաշնակցական գործիչը։