Ձեր վստահելի աղբյուրը

Վարչապետի տիկին Աննա Հակոբյանի՝ Մոսկվայում հնչեցրած հայտարարությունները միանշանակ չեն ընդունվել: Ո՞ւմ էին հասցեագրված դրանք, ի՞նչ ուղերձներ էին պարունակում, ի՞նչ արձագանքներ են հետևել հայտարարություններին: 

Panorama.am-ն այս հարցերի վերաբերյալ խոսել է Ադրբեջանի հարցերով փորձագետ Անժելա Էլիբեգովայի հետ: Նա  ուսումնասիրել է արձագանքները, եկել եզրակացության, որ հայ հասարակության շրջանում հայտարարությունների որոշ հատվածներ չեն ընդունվել:

«Համենայն դեպս, ծավալված քննարկումները վկայում են, որ հայ հասարակության կողմից որոշ ձևակերպումներ չընկալվեցին դրական»,-ասաց փորձագետը:

Խոսքը մասնավորապես վերաբերում է հայտարարության հետևյալ հատվածին՝ «Իրականում ես կարծում եմ, որ կարևոր չէ, թե ինչպես է ծագել այս հակամարտությունը»: Էլիբեգովան ընդգծեց, որ հայ հասարակության համար սա շատ կարևոր հարց է, կոնֆլիկտը ծագել է, քանի որ տասնյակ տարիներ Ադրբեջանը հայ ժողովրդին ֆիզիկական բնաջանջման վտանգի ներքո է պահել:

«20-րդ դարի սկզբից ու  ողջ ընթացքում Ադրբեջանը պարբերաբար հայկական ջարդեր է կազմակերպել: Հակամարտությունը 88-ին չի սկսել, հիմա էլ չի ավարտվել: Իր հիմքում  կա շատ կարևոր սոցիալ-մշակութային խնդիր՝ մեզ փորձում են ոչնչացնել»,-մանրամասնեց Panorama.am-ի զրուցակիցը:

Հաջորդը, որը բացասաբար է ընդունվել, հայ և ադրբեջանցի զինվորների համեմատությունն է:

Հիշեցնենք, Աննա Հակոբյանն ասել էր. «Հավատացեք՝ նայելով ադրբեջանական զինվորներին, նրանց հայացքներին՝ ես արձանագրում էի, որ այդ երեխաները ոչնչով չեն տարբերվում մեր զինվորներից, նրանց աչքերի արտահայտությունը նույնն էր՝ վախվորած և անհանգիստ»:

Սոցցանցերում ուսումնասիրելով հայտարարության վերաբերյալ հնչած կարծիքները, Ա. Էլիբեգովան նշում է՝  շատերն արտահայտել են այն միտքը, որ ադրբեջանցի զինվորն ինչքան էլ «վախվորած հայացք» ունենա, միևնույն է՝ կտրում է հայ զինվորի գլուխը, խոշտանգում է պատերազմի ժամանակ, այն, ինչ տեսել ենք 2016-ի ապրիլին:

«Այն կարծիքը, որ ադրբեջանցի զինվորները դուրս չեն գա հայերի դեմ կռվելու, 2016-ի ապրիլին տեսանք, որ սխալ է, այդպես չէ»,-ընդգծեց նա:

Ինչ վերաբերում է լսարաններին, ապա Էլիբեգովայի համար հարցը հասկանալի չէ: «Եթե Ադրբեջանի կողմից պատասխանի ակնկալիք կա, ապա ի սկզբանե կարող եմ ասել, ազնիվ դրական միտում ադրբեջանական կողմից չարժե սպասել: Մենք գիտենք, որ բացի առաջին տիկին լինելուց, Մեհրիբան Ալիևան նաև այդ երկրի առաջին փոխնախագահն է, պաշտոնական դիրքից օգտվելով,  բազմիցս հակահայկական ելույթներ է ունեցել: Նման ելույթներ եղել են նաև մինչև պաշտոն զբաղեցնելը»,-ասաց Էլիբեգովան՝ հիշեցնելով, որ մի քանի տարի առաջ անգամ աուտիզմ ունեցող երեխաների ամանորյա հանդեսին ներկա Մեհրիբան Ալիևան խոսել է «օկուպացված տարածքների ազատագրումից»: Սա նշանակում է, որ նա առիթը  բաց չի թողնում հակահայկական հայտարարություններ անելու համար:

Կարծել, որ նա կփոխի դիրքորոշումը՝ դեպի խաղաղասիրություն, փորձագետն իրատեսական չի համարում:

«Խաղաղության ուղերձը շատ դրական է, որպես մայր, որի տղան ծառայում է Արցախում, որպես կին: Բնական է, ոչ մեկ չի ցանկանում, որ պատերազմ սկսկվի: Բայց այդ հայտարարությունների իրացման խնդիր կա, ինչո՞ւ է նման բան ասվում: Եթե որպես արդյունք դա բերելու է այն բանին, որ միջազգային իրավապաշտպան, մարդասիրական կազմակերպություններ սկսելու են զբաղվել Արցախում մարդու իրավունքների հարցերով, որոնք ոտնահարվում են Ադրբեջանի կողմից, այսինքն ուշադրություն են դարձվելու Ադրբեջանի կողմից մեկուսացման մեջ գտնվող կանանց, երեխաների իրավունքների պաշտպանությանը, շատ լավ է, սկզբունքային հարց է»,-կարծիք հայտնեց նա:

Նշենք, որ Աննա Հակոբյանը ներկաներին հրավիրել է այցելել Հայաստան և Արցախ ու կոչը հնչեցնել նաև այնտեղից։ Նա խնդրել է նաև, որ կանայք օգտագործեն սահմանի մյուս կողմից՝ Ադրբեջանից նույնպես այս կարևորը ուղերձը հղելու իրենց հնարավորությունը։

Էլիբեգովան դիտարկել է ադրբեջանական լրատվամիջոցների լրահոսը, որևէ անդրադարաձ վարչապետի տիկնոջ հայտարարություններին մինչ այս պահը չկա:

«Միգուցե ինչ-որ անդրադարձ հետագայում լինի, որովհետև իրենց համար էլ սա նոր ու անհասկանալի իրավիճակ է, չեն հասկանում ինչպես արձագանքել: Չեմ բացառում, որ մի քանի ժամ կամ օր անց սկսեն արձագանքները, բայց սպասել, որ դա կլինի անկեղծ խաղաղասիրական հարթակ երկխոսության համար, անիրատեսական է»,-ասաց փորձագետը: