Ձեր վստահելի աղբյուրը

«Հայաստանում բոլորը պետք է ունենան արդար դատաքննության իրավունք, անկախ անձանցից, անկախ որևէ այլ հատկանիշից»,- «Ամերիկայի Ձայնին» ասել է  աշխատանքային այցով ԱՄՆ-ում գտնվող արդարադատության նախարար Արտակ Զեյնալյանը՝ պատասխանելով հարցին, թե ՀՀ երկրորդ նախագահ Ռոբերտ Քոչարյանը կարո՞ղ է ակնկալել արդար դատավարություն Հայաստանում։

Նա նշել է, որ իրենք պարտավոր են բոլորի համար երաշխավորել և ապահովել արդար դատաքննության իրավունքը՝ իր բոլոր էլեմենտներով ու բաղադրատարրերով։

Հարցին, թե Ռ. Քոչարյանը խոսելով ՍԴ որոշման մասին, ասաց, որ այս դեպքում այն պետք է չեղյալ համարել, ինչպե՞ս կարձագանքեք, նախարարն ասաց. «Սահմանադրական դատարանի որոշումը չէր վերաբերվում կոնկրետ այն մեղադրանքին, որ առաջադրվել է Ռոբերտ Քոչարյանին: Դա վերաբերում էր ընտրության արդյունքներին։  Սահմանադրական դատարանի որոշմամբ դեպքերին գնահատական չի տրվել»։

Ա. Զեյնալյանը նաև ասաց, որ չի հետևում  վերաբացված «Մարտի 1-ի» գործի ընթացքին, իր ենթակայության տակ չէ, տեղյակ է այնքան, որքան հրապարակվում է մամուլում։ 

Հիշեցնենք, որ ՀՀ հատուկ քննչական ծառայությունում քննվող քրեական գործով նախաքննության ընթացքում ձեռք բերված ապացույցների բավարար համակցության հիման վրա 2018 թվականի հուլիսի 26-ին Հայաստանի Հանրապետության պաշտոնաթող Նախագահ Ռոբերտ Քոչարյանին նախօրեին մեղադրանք է առաջադրվել ՀՀ քրեական օրենսգրքի 300.1-ին հոդվածի 1-ին մասով այն բանի համար, որ նա այլ անձանց հետ նախնական համաձայնությամբ տապալել է Հայաստանի Հանրապետության սահմանադրական կարգը: Միջնորդություն է ներկայացվել Երևան քաղաքի ընդհանուր իրավասության առաջին ատյանի դատարան` Ռոբերտ Քոչարյանի նկատմամբ կալանավորումը որպես խափանման միջոց ընտրելու համար: Այժմ Երևան քաղաքի ընդհանուր իրավասության դատարանի Շենգավիթի նստավայրում ընթանում է Ռոբերտ Քոչարյանին կալանավորելու նախաքննական մարմնի միջնորդության քննությունը: