Ձեր վստահելի աղբյուրը

Երևան քաղաքի ընդհանուր իրավասության դատարանի Շենգավիթի նստավայրում վերսկսվել է Հայաստանի երկրորդ նախագահ Ռոբերտ Քոչարյանին կալանավորելու նախաքննական մարմնի միջնորդության քննությունը:

Նիստին մասնակցում է նաև Ռոբերտ  Քոչարյանը: Նշենք, որ ՀՀ երկորրդ նախագահի շահերը դատարանում պաշտպանում են Փաստաբանների պալատի նախկին նախագահ Ռուբեն Սահակայնն ու արդարադատության նախկին փոխնախարար Արամ Օրբելյանը:

Հիշեցնենք, որ ՀՀ հատուկ քննչական ծառայությունում քննվող քրեական գործով նախաքննության ընթացքում ձեռք բերված ապացույցների բավարար համակցության հիման վրա 2018 թվականի հուլիսի 26-ին Հայաստանի Հանրապետության պաշտոնաթող Նախագահ Ռոբերտ Քոչարյանին մեղադրանք է առաջադրվել ՀՀ քրեական օրենսգրքի 300.1-ին հոդվածի 1-ին մասով այն բանի համար, որ նա այլ անձանց հետ նախնական համաձայնությամբ տապալել է Հայաստանի Հանրապետության սահմանադրական կարգը:

Միջնորդություն է ներկայացվել Երևան քաղաքի ընդհանուր իրավասության առաջին ատյանի դատարան` Ռոբերտ Քոչարյանի նկատմամբ կալանավորումը որպես խափանման միջոց ընտրելու համար:

Քոչարյանը համարում է, որ իր նկատմամբ քաղաքական հետապնդում ու վենդետա է իրականացվում, մեղադրանքը համարում է շինծու, իրականությունից կտրված: Իսկ նրա փաստաբանները համարում են, որ քննչական մարմինը հապճեպություն է ցուցաբերում: