Ձեր վստահելի աղբյուրը

Յուրի Խաչատուրովի նկատմամբ կալանավորումը որպես խափանման միջոց ընտրելու միջնորդությունը դատարանը կքննի ժամը 18-ին, նիստը հետաձգվել է: Խաչատուրովի փաստաբան Միհրան Պողոսյանը  դատարանում աշխատող լրագրողներին հայտնեց, որ նիստն ընդմիջվել է մեղադրանքին ծանոթանալու, ինչպես նաև պաշտպանության իրավունքը պաշտպանելու համար:

«Մինչ այս պահը իմ պաշտպանյալին չի պարզաբանվել մեղադրանքի բնույթն ու հիմքերը: Իր համար անհասկանալի է, թե ինչում է  մեղադրվում: Դրանից հետո միայն կկարողանամ հարցերին պատասխանել ու մեկնաբանություն տալ»,-ասաց նա:

Նա նշեց, որ հոդվածը, որին հղում է արել ՀՔԾ-ն, ուժի մեջ է մտել 2009-ի մարտին:

«Դիրքորոշում ունեմ, որն այս պահին չեմ ասի, կներկայացնեմ դատարանում»,-ասաց Մ. Պողոսյանը:

Փաստաբանն ասաց, որ այսօրվա ընթացքում Խաչատուրովի գործով երկու նիստ է տեղի ունեցել, 11:30-ի նիստին իր պաշտպանյալը ներկա չի եղել, քանի որ ծանուցված չի եղել, իսկ ժամը 15-ի նիստին ներկայացել է:

Նշենք, որ Խաչատուրովին մեղադրանք առաջադրելու մասին ՀՔԾ-ն հայտարարեց այսօր:Նրան մեղադրանք է առաջադրվել ՀՀ քրեական օրենսգրքի 300.1-ին հոդվածի 1-ին մասով այն բանի համար, որ նա այլ անձանց հետ նախնական համաձայնությամբ տապալել է Հայաստանի Հանրապետության սահմանադրական կարգը:

Քննիչի կողմից միջնորդություն է ներկայացվել Երևան քաղաքի ընդհանուր իրավասության առաջին ատյանի դատարան` Յուրի Խաչատուրովի նկատմամբ կալանավորումը որպես խափանման միջոց ընտրելու համար: