Ձեր վստահելի աղբյուրը

«Ես ծայրաստիճան մտահոգիչ եմ համարում, որ Հանրապետության երկրորդ նախագահը քրեական  հետապնդման մեջ է։ Եթե իրավական լուրջ փաստարկներ լինեին, կարծում եմ՝ այդ փաստարկները պետք է ներկայացվաքծ լինեին նաև մամուլի հաղորդագրության մեջ։ Հաղորդագրությունը, սակայն չի պարունակում իրավական տարրեր, ավելին՝ ես այնտեղ տեսնում եմ լուրջ սխալ մեկնաբանություններ՝ և օրենքի, և տերմինաբանության մեջ »,- այսօր ԱԺ-ում լրագրողների հետ զրույցում ասաց «ՀՀԿ» խմբակցության անդամ, արդարադատության նախկին նախարար Դավիթ Հարությունյանը՝ անդրադառնալով Ռոբերտ Քոչարյանին մեղադրանք առաջադրելու փաստին:

Հարությունյանը չցանկացավ մեղադրանք առաջադրելու շուրջ մեկնաբանություններ անել, քանի որ, ըստ նրա, ծանոթ չէ այդ որոշմանը:

«Իսկ իրավական գնահատական տվել եմ այն հաղորդագրությանը, որն օրեր առաջ Միքայել Հարությունյանի հետ կապված հնչել էր մամուլում և գրեթե անփոփոխ հնչել է նաև Ռոբերտ Քոչարյանի հետ կապված։ Այդտեղ ես իրավական հատված չեմ տեսնում: Ինչ է առկա մեղադրանքում՝ չեմ կարող պատասխանել, դրա համար ձեռնպահ կմնամ իրավական գնահատական տալուց»,- ասաց նա: 

Դավիթ Հարությունյանը ասածն ավելի պատկերավոր դարձնելու համար նույնիսկ օրինակ բերեց. «Խոսվում է, որ բանակը կարող է օգտագործվել անվտանգության հարցերով, և գոնե ինձ մոտ տպավորություն է ստեղծվել, որ այդ նյութի հեղինակները ենթադրում են, որ ՀՀ անվտանգությունը միմիայն արտաքին սպառնալիքներն են: Իրականում այդպես  չէ, բավական է խորանալ իրավունքի մեջ, իմանալ օրենքները, անմիջապես պարզ կդառնա, որ Հայաստանի անվտանգությունն ունի թե՛ ներքին, թե՛ արտաքին կոմպոնենտ, և նման իրավիճակում թույլատրելի է բանակի օգտագործումը»,- ասաց նա:

Նրա խոսքով, ցանկացած իրավաբանի համար դժվար չէ բացել «Արտակարգ դրության իրավական ռեժիմի մասին» օրենքը, որն ընդունվել է, շատ ավելի ուշ՝ 2012 թվականիին, որը ևս հնարավորություն է նախատեսում արտակարգ դրության ժամանակ ԶՈւ–ի օգտագործում:

Նա նշեց, որ այդ օրենքի նախագիծն անցել է Վենետիկի հանձնաժողովի փրձաքննությունը և առարկություն ու մտահոգություն չի առաջացրել, քանի որ նման դրույթ բազմաթիվ երկրներում օգտագործված է:

ՀՀԿ ներկայացուցիչը նաև նկատեց, որպեսզի միանշանակ պնդում լինի, որ սահմանադրական կարգի նկատմամբ ոտնձգություն է եղել, առնվազն պետք է հիմքերը վերհանվեին և ոչ թե սկսեին նախագահից ու նրան մեղադրանք առաջադրեին:

Հարցին՝ նախագահի անձի անձեռնմխելիության խախտում եղե՞լ է, և թե ինչ հիմքերով կարող են Ռոբերտ Քոչարյանին պատասխանատվության ենթարկել, Դավիթ Հարությունյանը պատասխանեց՝ Սահմանադրությունը հստակ նախատեսել է՝ ՀՀ նախագահն ինչպիսի լիազորություններ ունի, և նախատեսել է, թե ինչ գործիքակազմ ունի նախագահը, որպեսզի իր լիազորությունները պատշաճ կյանքի կոչվեն:

«Արտակարգ դրություն հայտարարելը գործիքակազմ է, իսկ ինչո՞ւ է տրված նախագահին այդ գործիքակազմը, որովհետև նա պարտավոր էր ապահովել ՀՀ անվտանգությունը: Լիազորություններից բխող ցանկացած գործողություն չի կարող ենթադրել պատասխանատվություն այդ քայլերի համար, իսկ եթե դրանք չեն բխում նախագահի լիազորություններից, իհարկե, կարող են պատասխանատվության ենթարկել պարտականությունները կատարելուց հետո»,- ասաց նա:

Հարությունյանը համոզմունք հայտնեց , որ նախագահը չպետք է կաշկանդված լինի, հակառակ դեպքում, երբ լարված պահ է, ընդհուպ մինչև պատերազմական իրավիճակում նա կարող է լինել կաշկանդված՝ ենթադրելով, թե ինչ կլինի վաղը՝ իշխանափոխությունից հետո: 

«Ինչ վերաբերում է արտակարգ դրություն հայտարարելուն, իմ գնահատականն այսպիսին է, որ իրավիճակն այդ օրերին Երևանի կենտրոնում այնպիսին էր, որ արտակարգ դրություն չհայտարարելը կարող էր բերել լրացուցիչ զոհերի»,- ասաց նա:

Իսկ կիսո՞ւմ է ՀՀ երկրորդ նախագահ Ռոբերտ Քոչարյանի այն համոզմունքը, որ նրան մեղադրանք է առաջադրվել քաղաքական գործընթացներից հեռացնելու նպատակով, Դավիթ Հարությունյանն ասաց՝ դա քաղաքական գնահատական է:

«Նման ինչ-որ տենդենց կարող է նշմարվել. խոսքը վերաբերում է ոչ միայն Քոչարյանին, այլև ռազմական գործիչներին, որոնք երկար տարիներ հստակ և աներկբա դիրքորոշում են ունեցել մեր և Ադրբեջանի հարաբերությունների հարցում, ինչ-որ տենդենց տեսնում եմ, որ հենց այդ մարդկանց է մեղադրանք առաջադրվում: Այնպես որ որոշ մտահոգություններ այդ առումով ես ունեմ»,- ասաց նա՝ նշելով, որ ավելի ուշ ՀՀԿ-ն կանդրադառնա Ռոբերտ Քոչարյանի հարցին: