Ձեր վստահելի աղբյուրը

ՀՀ երկրորդ նախագահ Ռոբերտ Քոչարյանի նկատմամբ կալանավորումը որպես խափանման միջոց ընտրելու վերաբերյալ միջնորդությունը կքննվի այսօր՝ Երևան քաղաքի ընդհանուր իրավասության դատարանի Շենգավիթի նստավայրում ժամը 11:00-ին:

Հիշեցնենք, որ երեկ ուշ երեկոյան տեղի ունեցած դատական նիստում որոշում չկայացվեց:  Դատական նիստը հետաձգվեց: 

Դատարանի մոտ լրագրողների հետ զրույցում Ռոբերտ Քոչարյանի փաստաբաններից Ռուբեն Սահակյանը հայտարարեց, որ քննչական մարմնի կողմից շտապողականություն է տեսնում:

«Իհարկե, հապճեպություն եմ տեսնում: Դատարանին խնդրում եմ մարդկային վերաբերմունք ցուցաբերել մեր նկատմամբ: Ես դուրս եմ եկել Հատուկ քննչականից ժամը 18-ի սահմաններում, ինձ տվել են 136 էջ, բերել եմ տուն, էն հույսով, որ մի քիչ հանգստանամ, քանի որ ձերբակալված չէ, ծանոթանամ, կարողանամ գալ ներկայացնել: Եվ հանկարծ 9:35 ինձ տալիս են ծանուցագիր, որ ժամը 10-ին ներկայանամ դատական նիստի, 9:35-ին դրան ավելացավ ևս 10 էջ: Ես ե՞րբ հասցանեմ ծանոթանալ, որ առարկություններս ներկայացնեմ, մի՞թե սա հապճեպություն չէ, ե՞րբ հասցնեմ, թող կալանավորեն Ռոբերտ Քոչարյանին»,-ասել էր փաստաբանը:

Հարցին, թե փաստաբանը տեսնում է քրեական հետապնդման հիմքեր, Սահակյանը պատասխանեց. «Ոչ չեմ տեսնում ընդհանրապես հիմքեր, ականաջներից ձգված հիմնավորումներ են»:

 Հիշեցնենք, որ ՀՀ հատուկ քննչական ծառայությունում քննվող քրեական գործով նախաքննության ընթացքում ձեռք բերված ապացույցների բավարար համակցության հիման վրա 2018 թվականի հուլիսի 26-ին Հայաստանի Հանրապետության պաշտոնաթող Նախագահ Ռոբերտ Քոչարյանին մեղադրանք է առաջադրվել ՀՀ քրեական օրենսգրքի 300.1-ին հոդվածի 1-ին մասով այն բանի համար, որ նա այլ անձանց հետ նախնական համաձայնությամբ տապալել է Հայաստանի Հանրապետության սահմանադրական կարգը:

Միջնորդություն է ներկայացվել Երևան քաղաքի ընդհանուր իրավասության առաջին ատյանի դատարան` Ռոբերտ Քոչարյանի նկատմամբ կալանավորումը որպես խափանման միջոց ընտրելու համար:

Քոչարյանը համարում է, որ իր նկատմամբ քաղաքական հետապնդում ու վենդետա է իրականացվում, մեղադրանքը համարում է շինծու, իրականությունից կտրված: