Ձեր վստահելի աղբյուրը

ՀՀ երկրորդ նախագահի փաստաբան Ռուբեն Սահակյանն ընթացող ասուլիսում լրագրողներին տեղեկացրեց՝ վատառողջ է, խնդիրներ կան արյան շրջանառության հետ կապված: Պատճառը, նրա ներկայացմամբ, երեք օր անընդմեջ անքուն մնալն է ու սթրեսը:

Բացի այդ, հայտարարեց, լավ ծանոթ չէ դատարանի կողմից կայացրած որոշմանը, «որովհետև ուշ ժամի ստացել ենք որոշումը, բավականին ծավալուն է, որովհետև ժամանակը չի ներել, նաև այն պատճառով, որը սկզբից ասացի»:

Նա լրագրողներին խնդրեց իրեն ու Քոչարյանի մյուս փաստաբանին՝ Արամ Օրբելյանին չտալ այնպիսի հարցեր, որոնց պատասխանելը կխախտի այն ստորագրությունը, որը դրել են՝ խոստանալով չհրապարակել քննության տվյալները: Իսկ դա առաջացնում է քրեական պատասխանատվություն:

Ինչ վերաբերում է քրեական գործին, ապա Ռուբեն Սահակյանի խոսքով, այն իր մեջ ներառում է մարտիմեկյան իրադարձություններից մինչ օրս: Իր հայտարարությունների համար ելակետ է ընդունելու ՀՔԾ-ի հուլիսի 3-ի հայտարարությունը:

«Ռոբերտ Քոչարյանին մեղադրանք առաջադրվեց, գիտեք, որ հրավիրված էր, որպես վկա, բայց ասացին, որ որոշել են մեղադրանք առաջադրել ու հարցաքննել որպես մեղադրյալ: Իմ պրակտիկայում նման դեպք եղել է, ինձ էլ են մեղադրանք առաջադրել հենց միանգամից, հետո կարճել են հանցակազմի բացակայության պատճառով: Ես համոզված եմ, որ այս գործը կունենա նույն վախճանը»,-ասաց փաստաբանը:

Նա մանրամասնեց, քննիչի հայտարարությունից հետո Քոչարյանը ցուցմունք չի տվել, թեև իրենք պատրաստվել էին ցուցմունք տալ:

Նա հիշեցրեց, որ խնդրել են բավարար ժամանակ գործի նյութերին ծանոթանալու համար՝ 136+15 էջ:

«Պատկերացնո՞ւմ եք ծավալը, անձամբ ինձ համար կպահանջվեր մեկ օր, առնվազն 12 աշխատանքային ժամ, որ կարողանամ մտքերս համակարգչի մոտ ձևակերպեմ: Դատավորը մեզ լսեց, և մերժեց, պատճառաբանություն չի բերվել»,-նշեց նա ու վկայակոչեց Եվրոպական կոնվենցիայի դրույթը՝ գործի նյութերին ծանոթանալու համար բավարար ժամանակ տրամադրելու մասին:

Ռ. Սահակյանի խոսքով, ինքն ու գործընկեր փաստաբանները տարիներ շարունակ մի բան են երազել, եթե մարդուն մեղադրում են, ապա դա պետք է լինի օրենքի շրջանակում, եթե ուզում ես կալանավորել, ուրեմն օրենքի տառին համապատասխան պետք է կատարել գործողությունները, եթե անձը կատարել է մեղմ արարք, իրեն ավելի խիստ պատասխանատվություն կամ այլ բովանդակությամբ մեղադրանք մի առաջադրի:

«Նման խնդիր եղել է և Լևոն Տեր-Պետրոսյանի, և Ռոբերտ Քոչարյանի, և Սերժ Սարգսյանի օրոք: Եղավ թավշյա հեղափոխություն, մեծ հույսեր ստացանք փաստաբաններս, որ ինչ-որ բան փոխվելու է: Փարատվել են այդ հույսերը, արդեն համոզված եմ, որ նման հույս ունենալ չի կարելի: Չի լինելու դա առայժմ, եթե պարոն վարչապետը ձեռքը չխփի սեղանին, և ասի, էս ի՞նչ եք անում: Ես եկել եմ, որ ժողովուրդը հավատա ինձ, իսկ դուք, ինչպես գրվում է մամուլում, դանա՞կ եք խրում իմ թիկունքից, ինչո՞ւ եք ապօրինություն անում, դատավորին կարելի է հարցնել, գուցե դատավորը հրաժարական գրի, և մենք պրծնենք նման դատավորից, մյուսներին էլ դաս լինի»,-կարծիք հայտնեց փաստաբանը:

Ռ. Սահակյանի խոսքով, նույնիսկ նախանցած գիշեր 01:20-ի սահմաններում որոշում են բերել Ռ. Քոչարյանի նկատմամբ հետախուզում հայտարարելու մասին:

«Կարող էինք արթնացնել, որ չկալանավորեին ու բերին դահլիճ: Բայց չարթնացրեցինք, թող կալանավորեին: Չկալանավորեցին: Մենք հիմնավորեցինք, որ նրանց գործողությունները չեն հիմնավորում, որ Քոչարյանին պատշաճ կերպով ծանուցել են»,-ասաց Սահակյանը՝ նշելով, որ դատավորին ինքն ու Օրբելյանը բացատրել են, որ շտապել պետք չէ, սակայն դատավորն անդրդվելի էր, մեղադրող կողմն էլ պաշտպանել է դատավորին:

«Սա վկայում էր այն մասին, որ բավարարվելու է կալանավորման միջնորդությունը: Սա նաև ազդակ էր, որ չի բավարարվելու գրավի միջնորդությունը, որը մենք հնարավոր է ներկայացնեինք: Արդեն մեզ համար  ամեն ինչ հասկանալի էր, սա պատվեր է: Պատվեր, որը պետք է կատարվի: Թե ում կողմից է պատվերը, բնական է, ես չեմ կարող ասել, մտքումս ենթադրել կարող եմ, բայց բարձրաձայնել՝ ոչ: Կարող են մեղադրել, որ չճշտված տեղեկություն եմ հայտնում: Համենայն դեպս, ես գտնում եմ, որ մեղավորները գտնվում են գլխավոր դատախազությունում, Հատուկ քննչական ծառայությունում, իմ համոզմամբ, այս հարցում կան էլի մեղավորներ, «չհասկացողներ», «չկողմնորոշվողներ», արդարադատությունը յուրովի ընկալողներ»,-ասաց Սահակյանը: