Ձեր վստահելի աղբյուրը

«Այո, միջնորդել ենք, որ Ռոբերտ Քոչարյանն ազատ արձակվի գրավի փոխարեն: Մերժվել է»,-լրագրոների հետ հանդիպմանը հայտարարեց  ՀՀ երկրորդ նախագահ Ռոբերտ Քոչարյանի փաստաբան Ռուբեն Սահակյանը:

Նրա խոսքով, բավականին մեծ գումար են առաջարկել, բայց ոչ առասպելական թվեր:
«Առաջարկվող գումարը շատ հեռու էր մեկ մլրդ դրամից»,-լրագրողների հարցասիրությանն  ի պատասխան Սահակյանին լրացրեց Քոչարյանի գրասենյակի ղեկավար Վիկտոր Սողոմոնյանը:

Ռ. Սահակյանը կոչ արեց նախաքննական մարմնին՝ հրապարակել գործի նյութերի մի հատված, մասնավորապես խափանման միջոց ընտրելու այն որոշումը, որը երկու օր քննարկվում էր դատարանում: Փաստաբանի խոսքով, դրա հրապարակման արդյունքում կերևա, որ գործի նյութերը թաքցվել են:

«Ի տարբերություն մեզ՝ պաշտպաններիս, նախաքննական մարմինն իրավունք ունի հրապարակել քրեական գործի նյութերի որոշ հատված, որը ինքը նպատակահարմար է գտնում»,-հիշեցրեց Սահակյանը:

Վ. Սողոմոնյանն էլ նշեց, որ սա իրավական բեսպրեդել է, հույս հայտնեց, որ Քոչարյանն ազատ կարձակվի: