Հազար բնակչից պակաս գյուղերին պետք է լուրջ հարկային արտոնություններ տալ և չվախենալ դրանից. Ս. Բագրատյան
«Համայնքների զարգացման խնդիրները գալիս են ընտրություններից»,- այսօր Ազգային ժողովում «Համայնքներում առկա խնդիրները, տարածքային համաչափ զարգացման հնարավորությունները ՀՀ-ում» թեմայով քննարկման ժամանկ ասաց Հայաստանի գործատուների հանրապետական միության նախագահ Գագիկ Մակարյանը և նշեց, որ համայնքների զարգացման խմդիրների հետ կապված 20 կետ է առանձնացրել։
«Առաջնայինը կուսակցական շահն է, և քանի որ իշխանություններն այնպիսի մոդել են ստեղծել, որ համայնքնի ղեկավարներն առանց հոգսերի ձգտել են դոտացիաներ ստանալ, որ հասնում են 80 տոկոսի, ունեցել են ուռճացված ծախսեր, բայց ոչ թե սեփական բյուջեն են ձևավորել։ Իսկ մյուս կետն էլ այն է, որ խոշորացման դեպքում հստակ չէ, թե համայնքները ինչի համար են իրար միանում և իրենց հետ ինչ ռեսուրս են բերելու», -ասաց Մակարյանը։
Նրա խոսքով՝ հաջորդ խնդիրը կապված է բիզնեսների խտության հետ՝ հազար աշխատունակ տարիքի բնակչության դեպքում. «ՀՀ-ում առանձնապես աչքի չի ընկնում բիզնեսով զբաղվելու ձգտումը: ՓՄՁ-ները համայնքներում միջինը գտնվում են 1 տոկոսովի սահմանում, ինչից զավեշտալի թվեր են ստացվում, եթե հաշվարկում ես ՀՆԱ-ի կամ բյուջեի հաշվին։ Աշխատանքի ներգրավվածության խնդիր կա, տարեկան շուրջ 30 000 բնակիչ մեկնում է միգրացիոն աշխատանքի, և հիմնական մասը պատճառաբանում է, որ աշխատանքի տեղավորման խնդիր կա, դրա համար են գնում միգրացիայի»։
Հայաստանի գործատուների հանրապետական միության նախագահ ը հավելեց, որ մարզերի զարգացման դինամիկան պետք է համակողմանի քննարկվի:
Հանրապետական խմբակցության պատգամավոր Խոսրով Հարությունյանը նշեց, որ «համայնքների համաչափ զարգացում» ասվածը բավականին լուրջ, ընդ որում գիտականորեն հիմնավորման կարիք ունեցող խնդիր է։
Պատգամավորի հիշեցրեց, որ ԱԺ նախագահ եղած ժամանակ, երբ Վայոց ձորի համայնքներում հանդիպման էր, մարդիկ առանձին հարցերով էին մոտենում, իրենց խնդիրները ներկայացնում. «Մի կին մոտեցավ՝ երեխան ձեռքից բռնած, տրտնջաց, թե ինչքան վատ են իրենք ապրում: Ես ոչ մի առարկություն չէի կարող բերել, պատասխանը, ուղղակի որ սփոփեր, որ դե ժամանակին կլուծենք, ինքն ասաց՝ «անիծվեր այն օրը, որ ես էս գյուղում ծնվեցի: Սա ամենամեծ պրոբլեմն է մեզ համար, երբ մարդն ասում է՝ բախտս չբերեց և գոնե մարզկենտրոնում չծնվեցի: Իսկ որևիցե մեկի բախտն էլ չբերեց, որ չծնվեց Երևանում»:
Հետևաբար, նրա խոսքով, տարածքների համաչափ զարգացման համար մարդուն ոչ միայն նյութական, այլ նաև ոչ նյութական կարիքները բավարարելու համար անհրաժեշտ պայմաններ են պետք:
«Առաջիկայում վերլուծությունների, քննարկումների մի ամբողջ շարք պետք է սկսել, որի արդյունքը պետք է լինի կազմել անելիքները, ճանապարհային քարտեզը, եթե չարեցինք՝ անընդհատ կխոսենք ու հարցը տեղից չի շարժվի, պետք է գծել ճանապարհային քարտեզը՝ առանձնացնելով առաջնահերթությունները»,-ասաց պատգամավորը։
«Ծառուկյան» խմբակցության պատգամավոր Սերգեյ Բագրատյանի կարծիքով էլ՝ այսօր հասել ենք մի վիճակի, որ այլևս պետք է գնալ ոչ ստանդարտ լուծումների ճանապարհով։
«Այսքան ուշացնելն ու մարզերի այսքան հետ մնալը Երևանից մեզ հուշում է ոչ ստանդարտ լուծումներ։ Նախ պետք է մենք ձևակերպենք մեր մեծ երազանքը, նախ՝ ալպյան գոտիներում գտնվող գյուղերում հատկապես օրգանիկ ապրանքատեսակների արտադրության կազմակերպումը խիստ կարևորում եմ։ Պետք է համարձակ քայլերի գնանք, այսինքն հազար բնակչից պակաս գյուղերին պետք է լուրջ հարկային արտոնություններ տալ և չվախենալ դրանից»,- ասաց Բագրատյանը։
Նրա խոսքով, Երևանի՝ հատկապես կենտրոնը հրատապ բեռնաթափման կարիք ունի. «Այստեղ պետք է բանաձև տալ՝ քայլ դեպի գյուղ։ Եթե կարողանանք գյուղական միջավայրում գեղեցիկ ապրելու մշակույթը ձևավորել, մենք շատ հայրենակիցներ կունենանք, ովքեր քաղաքի չարքաշ կյանիքց կտեղափվեն գյուղ»։
Բագրատյանը հավելեց, որ ինովացիաների կիրառումը պետք է սկսել հենց գյուղերից։
Լրահոս
Տեսանյութեր
Եթե Ադրբեջանը վստահ է, ինչո՞ւ է դատական գործընթացները դադարեցնելու մասին գաղափար առաջ քաշում
