Ձեր վստահելի աղբյուրը

Beeline-ի աջակցությամբ Սևանի ափին ավարտվել է «Սևան Ստարտափ Սամմիթ 2018»-ը: Վերջին մրցութային օրվա ընթացքում Beeline-ի Գլխավոր տնօրեն Անդրեյ Պյատախինը մասնակցել է ժյուրիի աշխատանքին։

Վրանային ճամբարի ձևաչափով սամմիթն անցկացվել է հուլիսի 22-ից 29-ը և ուղղված է եղել ստարտափների և ներդրողների միջև համագործակցության նոր ուղիների հայտնաբերմանը: Միջոցառումն ունեցել է ավելի քան 1000 մասնակից աշխարհի 35 երկրներից։ Սամմիթի մասնակից 150 ստարտափները հնարավորություն են ստացել մասնակցելու դասախոսությունների և ոչ ֆորմալ պայմաններում շփվելու հայտնի ձեռներեցների և մասնագետների հետ, հանդիպելու բազում ներդրողների և ներդրումային ընկերությունների ողջ աշխարհից, և ձեռք բերել նախնական պայմանավորվածություններ։

Beeline Հայաստան, Հասարակայնության հետ կապերի ծառայությունից հայտնում են, որ այս տարի սամմիթը դուրս է եկել միջազգային հարթակ՝ որպես «Սիսայդ Ստարտափ Սամմիթ», և անցկացվել ԱՄԷ-ում և Հնդկաստանում։ Սևանի ափին անցկացվող սամմիթը եզրափակիչ միջոցառումն էր, որի ժամանակ ամփոփվել են նաև ԱՄԷ-ի և Հնդկաստանի համաժողովների արդյունքները։

Սամմիթի արդյունքներն ամփոփվել են հուլիսի 28-ի կայացած փակման միջոցառման ընթացքում, որին մասնակցել է նաև ՀՀ նախագահ Արմեն Սարգասյաը։

«Այսօր ես մասնակցեցի ժյուրիի աշխատանքին և շատ ուժեղ թիմեր տեսա՝ Հայաստանից ու արտասահմանից։ Անկասկած, սամմիթի միջազգային հարթակ դուրս գալը հայկական ստարտափների համար շատ օգտակար կլինի և զգալիորեն կբարելավի Հայաստանի ստարտափ էկոհամակարգը։ Հենց դա է մեր նպատակը կորպորատիվ պատասխանատվության տեսակետից և հենց դրա համար ենք մենք գործարկել մեր ինկուբատորն ու սատարում ենք այնպիսի միջոցառումների, ինչպիսին է Սևան Ստարտափ Սամմիթը։ Շատ ուրախ եմ, որ այս սամիթի լավագույն ստարտափներից մեկը որպես պարգև կդառնա մեր ինկուբատորի ռեզիդենտը», - նշել է Հայաստանում Beeline-ի Գլխավոր տնօրեն Անդրեյ Պյատախինը։

Այս տարի Beeline-ը ներկայացրել էր հատուկ մրցանակ հաղթող թիմերից մեկի համար՝ Beeline Ստարտափ Ինկուբատորում առանց մրցույթի ինկուբացիոն ցիկլ անցնելու հնարավորություն, որը պարգևատրման արարողության ժամանակ հանձնվեց Roads Vision թիմին։

Սամմիթի ընդհանուր մրցանակային ֆոնդը կազմել 50 000 ԱՄՆ դոլար, իսկ 100 000 ԱՄՆ դոլար ներդրումային ֆոնդով աքսելերացիոն ծրագրի հաղթող ստարտափների անունները կհայտարարվեն շուտով։

«Սևան Ստարտափ Սամմիթ 2018-ը կարող ենք համարել հաջողված նախագիծ, քանի որ վերջապես մեզ հաջողվեց միավորել աշխարհի զարգացած ստարտափ էկոհամակարգեր ունեցող երկրների ներկայացուցիչների։ Ցանկանում եմ շնորհակալություն հայտնել բոլոր մեր գործընկերներին, ովքեր նպաստեցին նախագծի իրականացմանը։ Beeline-ն արդեն երկրորդ տարին է, որ մեզ հետ է և վստահ ենք, որ համագործակցությունը կշարունակվի»,- նշել է «Սևան Ստարտափ Սամմիթ»-ի տնօրեն Վահագն Ռափյանը։

Beeline-ն արդեն  երկրորդ տարին է հանդես գալիս որպես սամմիթի գլխավոր գարծընկեր։ Ընկերությունը սամմիթին աջակցություն է ցուցաբերում «Ստարտափ Արմենիա» հիմնադրամի հետ համագործակցության շրջանակում՝ այդ թվում մասնակիցներին տրամադրելով ինտերնետ հասանելիություն: