Ձեր վստահելի աղբյուրը

Հայաստանը տրամադրված է, որ որևիցե քայլ չպետք է անի, որից կտուժի ՀԱՊԿ հեղինակությունը: Լրագրողների հետ ընթացող հանդիպմանը հայտարարեց ԱԳՆ խոսնակ Տիգրան Բալայանը:

Նա ասաց՝ Հայաստանը շահագրգռված է, որ  ՀԱՊԿ-ը շարունակի իր բնականոն աշխատանքը, որի մասին տեղեկացրել է թե հրապարակային, թե գործընկերների  հետ շփումներում:

«Մեր քայլերն ամբողջությամբ համապատասխանում են ՀԱՊԿ իրավական կարգավիճակի մասին համաձայնագրի դրույթներին»,-ասաց ԱԳՆ խոսնակ Տիգրան Բալայանը՝ հիշեցնելով, որ ԱԳՆ-ն կազմակերպության գործընկեր երկրներին առաջարկել է սկսել գլխավոր քարտուղարի փոփոխման գործընթացը:

Նրա խոսքով, այս պահի դրությամբ ինտենսիվ քննարկումները շարունակվում են:

«Մեր ներգրավվածությունը ՀԱՊԿ-ում նպաստել է միայն այդ կառույցի ուժեղացմանը, ընդհանրապես նայեք ՀԱՊԿ-ում մեր վերջին նախագահությունները, կարևորագույն փաստաթղթերը ՀԱՊԿ-ում ընդունվել են հենց մեր նախագահությունների օրոք: Օրինակ ՀԱՊԿ զարգացման հայեցակարգն ընդունվեց հենց մեր նախագահության օրոք՝ 2016 թվականին Երևանում: Նախորդ նախագահության օրոք՝  2009-ին ընդունվեց ՀԱՊԿ խաղաղապահ ուժերի մասին համաձայնագիրը, որն էլ մեր նախաձեռնությամբ էր»,-ասաց Տ. Բալայանը:

Ինչ վերաբերում է հարցին, թե ով պետք է փոխարինի Խաչատուրովին, ԱԳՆ խոսնակը հիշեցրեց՝ Յուրի Խաչատուրովը դեռևս այդ կազմակերպության գլխավոր քարտուղարն է:

«Քանի ՀԱՊԿ խորհուրդը որոշում չի կայացրել  նրան  փոխարինելու վերաբերյալ, ինքը շարունակում է մնալ այդ պաշտոնին: Փոփոխման գործընթացը, որ մենք առաջարկել ենք սկսել,  ընթացող քննարկումները, դեռ չեն նշանակում, որ  պարոն Խաչատուրովն ազատված է այդ պաշտոնից: Նա շարունակում է  մնալ ՀԱՊԿ գլխավոր  քարտուղար այսօր ևս»,-ասաց Տ. Բալայանը:

Ինչ վերաբերում է Խաչատուրովին հայաստանցի մեկ այլ պաշտոնյայով փոխարինելու հնարավորությանը, նախարարության ներկայացուցիչն ասաց, թե ով, ինչպես ու ինչ ժամանակահատվածում  կփոխարինի Խաչատուրովին, դա արդեն քննարկումների ու կոնսենսունսով կայացվելիք հարց է:

Հիշեցնենք, որ Յուրի Խաչատուրովին մեղադրանք է առաջադրվել: Դատարանի որոշմամբ նրա նկատմամաբ այլընտրանքային խափանման միջոց ընտրվել՝ 5 մլն դրամ գրավի դիմաց նա ազատության մեջ է: