Ձեր վստահելի աղբյուրը

ՀՀ պաշտոնաթող նախագահ Ռոբերտ Քոչարյանի նկատմամբ որպես խափանման միջոց կալանավորումը ընտրելու վերաբերյալ դատարանի որոշումը բողոքարկող փաստաբանների դիմումը մուտք է եղել դատարան:

«Մոտ 15-20 րոպե առաջ այն մուտք եղավ դատարան»,-Panorama.am-ին հայտնեց Քոչարյանի փաստաբան Արամ Օրբելյանը:

Դիմումին կից ներկայացվել են նաև ԱԺ մոտ չորս տասնյակ պատգամավորների երաշխավորությունը՝ Քոչարյանին ազատ արձակելու վերաբերյալ:

«Պատգամավորների ստորագրություններն ուղարկվում են դատախազին՝ որպես ֆորմալ գործընթաց, դատավորին դա ներկայացվել է ի գիտություն, որ նման գործիք կա և ավելի թեթև սահմանափակում, քան կալանքն է, կարող է կիրառվել»,-ասաց Օրբելյանը:

Թե երբ կքննի դատարանը փաստաբանների դիմումը, այս պահին հայտնի չէ: Օրբելյանը կարծում է՝ 1-2 օրվա ընթացքում պարզ կլինի:

Փաստաբանը երեկ չէ առաջին օրը  հանդիպել է  կալանավորված Ռոբերտ Քոչարյանին, վերջինը պնդում է՝ մեղադրանքը չի ընդունում:

«Տրամադրությունը նորմալ էր, առողջական վիճակը նորմալ էր, այդ առումով որևէ խնդիր չկար»,-ասաց Օրբելյանը:

Հիշեցնենք, որ ՀՀ երկրորդ նախագահ Ռոբերտ Քոչարյանը դատարանի որոշմամաբ կալանավորվել է երկու ամսով: Նա մեղադրվում է ՀՀ քրեական օրենսգրքի 300.1-ին հոդվածի 1-ին մասով այն բանի համար, որ նա այլ անձանց հետ նախնական համաձայնությամբ տապալել է Հայաստանի Հանրապետության սահմանադրական կարգը:

Մեղադրանքի առաջադրումից ու կալանավորման միջնորդություն ներկայացնելուց հետո Քոչարյանը հայտարարեց, որ իր նկատմամբ քաղաքական հետապնդում և վենդետա է իրականացվում: