Փայլան․ «Չեն թողնում, որ մեր պատրիարքին ընտրենք, բայց «ազատ» ենք ապրում»
Թուրքիայի կրոնական փոքրամասնությունների առաջնորդները և ներկայացուցիչները հայտարարություն են տարածել՝ հերքելով Թուրքիայում այլ կրոն դավանողների նկատմամբ ճնշումների մասին լուրերը։
Հայտարարության մեջ նշվել է, որ նախկինում եղած դժվարությունները ժամանակի ընթացքում լուծվել են։
«Պետական հաստատությունների հետ մշտական խորհրդակցություններ ենք կատարում այն խնդիրների շուրջ, որոնք ցանկանում ենք լուծել»,-նշվել է հայտարարության մեջ։
Հայ համայնքի ներկայացուցիչներից հայտարարության տակ ստորագրել են Պոլսո հայոց պատրիարքի փոխանորդ Արամ արքեպիսկոպոս Աթեշյանը, Հայ կաթոլիկ եկեղեցու առաջնորդ Լևոն Զեքիյանը, Գետիկփաշայի հայ բողոքական եկեղեցու և դպրոցի հիմնադրամի հոգևոր ղեկավար հովիվ Գրիգոր Աղաբալօղլուն, Սուրբ Փրկիչ հայկական հիվանդանոցի հիմնադրամի նախագահ Պետրոս Շիրինօղլուն, Ս․ Հակոբ հայ կաթոլիկ հիվանդանոցի հիմնադրամի նախագահ Բերնարդ Սարըբայը:
Ստորագրողների թվում են եղել նաև Հույն ուղղափառ եկեղեցու պատրիարք Բարդուղիմեոս Առաջինը, Թուրքիայի րաբունապետ Իսակ Հալևան։
«Էրմենիհաբեր»-ի փոխանցմամբ, հայտարարությունը մեկնաբանել է Թուրքիայի խորհրդարանի պոլսահայ պատգամավոր Գարո Փայլանը։
Նա «Twitter»-ում հետևյալ գրառումն է կատարել․ «Չեն թողնում, որ մեր պատրիարքին ընտրենք, չեն թողնում, որ հոգևոր դպրոցը բացենք, թույլ չեն տալիս, որ եկեղեցու հիմնադրամների ղեկավարների ընտրություններ անցկացնենք, մնացած մի բուռ համայնքն էլ աղավնու պես երկչոտ է, բայց «ազատ նք ապրում»։ Այս հայտարարությունն անգամ ապացույց է, որ ազատ չենք»։
Նշենք, որ ըստ «Ակօս» շաբաթաթերթի՝ համատեղ հայտարարությունը կապված է Թուրքիայում կալանավորված ամերիկացի հոգևորական Էնդրյու Բրանսոնի դատական գործի վերաբերյալ ԱՄՆ փոխնախագահ Մայք Փենսի հայտարարությունների հետ։
Վերջինը ասել էր, որ Թուրքիայի կառավարությունը Բրանսոնի դեմ մեղադրականում նրան մեղադրել է երկիրը բաժանելու/պառակտելու մեջ, քանի որ Բրանսոնն այնտեղ տարածում էր քրիստոնական հավատքը։
Հարակից հրապարակումներ`
Լրահոս
Տեսանյութեր
Կառավարության համար ՀՀ ո՞ր քաղաքացիներն են համարվելու իրական Հայաստանի քաղաքացիներ. Ռուստամյան
