Ձեր վստահելի աղբյուրը

Այս տարի հանրակրթական դպրոցի շրջանավարտների թիվը եղել է 9600, իսկ բուհերի տեղերը 21000 հազար էին: Այս մասին այսօր լրագրողների հետ հանդիպմանը հայտնեց ՀՀ ԿԳՆ Գնահատման և թեստավորման կենտրոնի փոխտնօրեն Կարո Նասիբյանը՝ նշելով, որ բուհեր ընդունվել ցանկացողների թիվը 5456 էր:  Դիմորդներից ընդունվել է 4616-ը:

Նասիբյանը մանրամասնեց, որ ավելի շատ դիմել են ԵՊՀ՝ 1701 դիմորդ, որոնցից ընդունվել են 1496-ը: Երկրորդ տեղում է Հայաստանի ազգային պոլիտեխնիկական համալսարանը՝ 558 դիմորդից ընդունվել են 476-ը: Երրորդում՝ Երևանի պետական բժշկական համալսարանը, որտեղ դիմել է 517, ընդունվել՝ 418 դիմորդ, իսկ սրան հաջորդում  են Հայաստանի պետական տնտեսագիտական և Մանկավարժական համալսրանները:

«Բացի պետականներից՝ դիմորդները դիմել են նաև երեք ոչ պետական բուհեր: Դիմել են ընդամենը 30 հոգի»,- ասաց ԳԹԿ փոխտնօրենը:

Նա հայտնեց, որ կտրված դիմորդները տարիներ շարունակ հնարավորություն են ունենում դիմելու այլ հաստատություններ, օրինակ՝ Ամերիկյան, Ֆրանսիական համալսրաններ կամ Վազգեն Սարգսյանի ռազմական ինստիտուտ. «Կտրված և ոչ մի տեղ չդիմած դիմորդների թիվն այս տարի եղել է 156»:

Նասիբյանը նշեց, որ չնայած դիմորդների թվի քիչ լինելուն, եղել են մասնագիտություններ, որտեղ թափուր տեղեր չեն մնացել. «Օրինակ ԵՊՀ-ում բոլոր մասնագիտություններում թափուր տեղեր կան, բացառությամբ՝ «Տեղեկատվական տեխնոլոգիաներ», «Տեղեկատվական անվտանգություն», «Իրավագիտություն» և «Ինֆորմատիկա և կիրառական մաթեմատիկա» մասնագիտությունների»: Պոլիտեխնիկում ևս կան ՏՏ ոլորտի մասնագիտություններ, որտեղ թափուր տեղեր չկան: Եղել են մասնագիտություններ, որոնք ընդհանրապես դիմորդ չեն ունեցել, օրինակ Մանկավարժական համալսարանի՝ «Շախմատ», «Սուրդոմանկավարժություն», Բրյուսովի՝ «Լրագրություն», «Միջմշակութային հաղորդակցություն» մասնագիտությունները»:

Անդրադառնալով ըստ մարզերի դիմորդների ընդունելությանը՝ նա տեղեկացրեց, որ Երևանից դիմել է 1964 շրջանավարտ, ընդունվել՝ 1610-ը, այսինքն 82 տոկոսն ընդունվել է: Ամենաբարձր ցուցանիշն ապահովել է Կոտայքի մարզը՝ դիմել են 445, ընդունվել է 408-ը՝ պահպանելով 92 տոկոսը: Նրա խոսքով՝ Երևանի հետ հավասար է միայն Տավուշի մարզը, մնացած բոլորը ցածր են 82 տոկոսից: