Ձեր վստահելի աղբյուրը

Արցախի հնագիտական արշավախումբը Տիգրանակերտում պեղումներ իրականացնելու ընթացքում հյուսիսային պատի մոտ հայտնաբերել է անտիկ ժամանակաշրջանից կարասային թաղումներ (հին ժամանակներում հանգուցյալներին հուղարկավորում էին նաև կարասներում): «Արցախպրես»-ի  թղթակցի հետ զրույցում ասել է «Պատմական միջավայրի պահպանության պետական ծառայություն» ՊՈԱԿ-ի  տնօրեն Արմինե Հայրապետյանը:

Նրա խոսքով, պեղումներն իրականացվել են ռուսաստանաբնակ բարերար Արտեմ Քոչարյանի ֆինանսավորմամբ: Այդ  պեղումների ժամանակ էլ գտնվել են թվով երեք  կարաս:

«Կարասների չափսերից երևում է, որ մեկը մանկան համար  էր. այդ  կարասի վրա պատկերված  են   որսի և այլ պատկերներ: Գտնված կարասները դեռ պետք է վերակագնվեն, որը բավական մեծ  գործ է: Հստակ տեղեկություններ և վկայություններ այս պահի դրությամբ մասնագետները դժվարանում են ասել. նյութը դեռևս  խորն  ուսումնասիրման  կարիք  ունի, սակայն կարող ենք ասել, որ այն մ.թ.ա 1-ին և մ.թ. 1 դարերին  է վերաբերում: Ի  դեպ, երկրագիտական թանգարանում ցուցադրության դրված կա   նմանատիպ  կարաս»,-տեղեկացրել է  Ա. Հայրապետյանը և  նշել, որ հուլիսի 10-ից Տիգրանակերտում  սկսված հնագիտական պեղումները  շարունակվելու են  մինչև օգոստոսի 17-18-ը: