Ձեր վստահելի աղբյուրը

«ՀՀ պաշտպանության ժամանակ զինծառայողների կյանքին կամ առողջությանը պատճառված վնասների հատուցման մասին» օրենքում կիրականացվեն փոփոխություններ:

ՀՀ վարչապետ Նիկոլ Փաշինյանը կառավարության այսօրվա նիստում հայտարարեց, որ ըստ այդ փոփոխությունների, «Զինծառայողների ապահովագրության հիմնադրամ»-ի շահառուներ կհամարվեն նաև 2015 և 2016 թթ-ի դեպքերի հետևանքով զոհված կամ հաշմանդամություն ձեռք բերած զինծառայողները կամ նրանց ընտանիքները։ 

«Խոսքը Հայաստանի Հանրապետության պաշտպանության ժամանակ զոհված կամ հաշմանդամություն ստացած անձանց և նրանց հարազատներին հատուցելու օրենքի նախագծի մասին է, դա հանրության շրջանում հայտնի է «1000 դրամների» մասին օրենք անվամբ։ Գիտեք՝  ընթացիկ կարգով նախատեսվում էր, որ այդ մեխանիզմի շահառու են համարվում 2017 հունվարի 1-ից հետո տեղի ունեցած դեպքերով զոհված կամ հաշմանդամություն ձեռք բերած անձինք կամ նրանց հարազատները։ ՊՆ-ի հետ համատեղ քննարկեցինք և պարզեցինք, որ կա հնարավորություն այդ ամսաթիվը երկու տարով հետ տանել։ Ըստ այդմ՝ օրենսդրական կարգավորումը կտարածվի 2015 և 2016 թթ-ի հունվարի մեկից հետո տեղի ունեցած դեպքերի վրա»,- ընդգծեց վարչապետը:

ՀՀ պաշտպանության նախարար Դավիթ Տոնոյանը տեղեկացրեց, որ այսօր կայանալու է հիմնադրամի հոգաբարձուների խորհրդի նիստը, որի օրակարգում ընդգրկված է նախկին զինծառայողներին շահառու ճանաչելու վերաբերյալ հարցը:

«Ընդհանուր առմամբ, շահառու կարող է դառնալ 183 զոհվածի ընտանիք և զինհաշմանդամ, մասնավորապես՝ 156 զոհված զինծառայողի ընտանիք և 27 զինհաշմանդամ»,- ընդգծեց Դավիթ Տոնոյանը:

Նիկոլ Փաշինյանն էլ հայտնեց, որ ապրիլյան պատերազմի զոհերի ընտանիքներն ու զինհաշմանդամները նախկինում շահառու չէին հանդիսանում, բայց այս փոփոխությամբ այդ հարցը ևս կլուծվի:

«Պետք է կոչ անենք, որ բոլոր ընկերությունները պարտաճանաչ կատարեն վճարումները: Այս հիմնադրամը պետք է մեծանա, որպեսզի շահառու դարձնենք ավելի վաղ ժամանակաշրջանում վիրավորված զինհաշմանդամներին և զոհված զինծառայողների ընտանիքներին»,- հայտարարեց վարչապետը: