Ձեր վստահելի աղբյուրը

Այսօր ԱԺ բակում տեղի ունեցավ «Գերագույն խորհուրդ պատգամավորական ակումբ»-ի և ՀՀ Ազգային ժողովի կողմից պատրաստված «Անկախ Հայաստանի առաջին խորհրդարանները» տեղեկագրի շնորհանդեսը:

Ինչպես ներկաներին ասաց իրավապաշտպան, ԳԽ պատգամավոր Ռուբեն Թորոսյանը, այսօվա շնորհանդեսին ներկայացվելու է երկու գիրք, սակայն հիմնականը լինելու է «Անկախ Հայաստանի առաջին խորհրդարանները» տեղեկագիրը։

«Երկրորդ գիրքը կոչվում է «Պատմում է Արամ Մանուկյանի և վարչապետի անձնական քարտուղարը»։ Առաջին անգամ է, որ անձնական քարտուղարը ներկայացնում է վարչապետերի մասին իր հուշերը»,- ասաց նա։

Ինչ վերաբերում է տեղեկագրին, ապա դրա շնորհանդեսին նվիրված միջոցառումն անցկացվում է առաջին խորհրդարանի 100-ամյակի շրջանակներում։

«Մենք մի շարք միջոցառումներ ենք անցկացրել։ Ես ուզում եմ շնորհակալություն հայտնել ԱԺ ղեկավարությանը, մանավանդ աշխատակազմին՝ մեզ աջակցելու համար։ Այս համագործակցությունը պատիվ է բերում բոլորիս»,- շեշտեց Ռուբեր Թորոսյանը՝ միաժամանակ հավելելով, որ ավելի վաղ Ստեփանավանում կազմակերպված միջոցառմանը որևէ լրատվամիջոց չի անդրադարձել, միակ շնորհավորական ուղերձը եղել է միայն ԱԺ նախագահ Արա Բաբլոյանինը։

Անդրադառնալով տեղեկագրի բովանդկությանը՝ նախկին պատգամավորը նշեց, որ իրենք փորձել են զուգահեռներ անցկացնել առաջին և 1990 թվականի խորհրդարանների միջև։

«Այստեղ կա Անկախության հռչակագիրը։ Ցավոք սրտի, չկարողացանք բոլոր պատգամավորների նկարները հայթայթել, սակայն արժե, որ 46 պատգամավորներին բոլորը ճանաչեն։ Իհարկե, այդ 46-ի մեջ կանայք չկային, իսկ մեր խորհրդարանում կանայք կային։  Որքան ինֆորմացիա կարողացել ենք, հայթայթել ենք»- ասաց ԳԽ պատգամավորը։

Ռուբեն Թորոսյանն անդրադարձավ նաև թավշյա հեղափոխությանը՝ նշելով, որ իրենք անվերապահ աջակցություն են հայտնել Նիկոլ Փաշինյանի կառավարությանը, սակայն պետք է նաև առողջ քննադատություն իրականացվի։

«Մենք առաջարկում ենք խորհրդարանի երկրորդ պալատի ստեղծմամբ ներգրավել միայն սփյուռքահայ ներկայացուցիչներին, ինչը կհանգեցնի Սփյուռքի ակիվացմանը։ Մենք պատրաստվում ենք քննարկումներ ծավալել նախագահի ինստիտուտի անհրաժեշտության շուրջ։ Իմ անձնական կարծիքն է, որ նախագահի ինստիտուտը լուրջ վնաս է հասցնում մեր երկրին։ Այն անիմաստ, փող վատնող ինստիտուտ է»,- ասաց բանախոսը։