Ձեր վստահելի աղբյուրը

Ջենովայում ավտոմոբիլային կամուրջը փլուզվել է մարդկային սխալի պատճառով, պատահականության մասին խոսք չկա։

Ռիա նովոստիի  հաղորդմամբ,  հայտարարել է իտալական քաղաքի դատախազ Ֆրանչեսկո Կոցցին։

Նրա խոսքով, դատախազությունը գործ է հարուցել, հավաքելու է կամրջի կառուցմանը, սպասարկմանը վերաբերող փաստաթղթեր և ցուցմունքներ։

«Մենք պետք է պատասխանենք միայն մեկ հարցի՝ ինչո՞ւ  տեղի ունեցավ փլուզում։ Դա մեր խնդիրն է, հանուն դրա  մենք ամեն հնարավորը կանենք»,- հավելել է Կոցցին։

Միաժամանակ Իտալիայի տնտեսական զարգացման նախարար, փոխվարչապետ Լուիջի Դի Մայոն կամուրջի փլուզման ողջ պատասխանատվությունը դրել է Autostrade per l'Italia ընկերության վրա, որը զբաղվում է երկրի ավտոճանապարհների կառավարմամբ ու սպասարկմամբ։ Նրա խոսքով, նախարարությունն արդեն  գործընթաց է սկսել Autostrade per l'Italia-ի հետ կոնսեսիոն պայմանագիրը խզելու ուղղությամբ։

Նախօրեին 200 մետր երկարությամբ կամուրջը փլուզվել է բնակելի տների և երկաթուղու վրա։ Այդ պահին կամրջի վրա ավելի քան 30 ավտոմեքենա է եղել։ Զոհվել է 37 մարդ։ Նրանցից հինգի ինքնությունը դեռ չի պարզվել։ 16 հոգի վիրավորվել է, նրանցից 12-ի  վիճակը ծանր է։

Որոնողափրկարարական աշխատանքները շարունակվում են․ Ջենովայում երկօրյա սուգ է հայտարարված։

Autostrade per l'Italia-ն հայտարարել է, որ Ջենովայում կամրջի վրա վերանորոգման աշխատանքներ էին ընթանում։ Ընկերության ղեկավարը հերքել է տեղեկատվությունը, որ կամուրջը վտանգավոր վիճակում էր գտնվում։