Ձեր վստահելի աղբյուրը

«Ռոբերտ Քոչարյանն իրավուքն ունի վերադառնալ որտեղ ուզում է և որտեղ արժանի է՝ դա լինի քաղաքականություն, թե բանտ։ Դա իմ որոշելիքը չէ։ Ես ինքս, որպես նախկին իրավաբան, ասել եմ, որ այդ դատավորը պարտավոր էր ինքնաբացարկ հայտարարել, քանի որ կար շահերի բախման տպավորություն։ Դա դատական համակարգի նկատմամբ իջեցնում է  հասարակության վստահությունը»,- այսօր տեղի ունեցած մամուլի ասուլիսի ժամանակ ասաց «Ժառանգություն» կուսակցության նախագահ Րաֆֆի Հովհաննիսյանը։

«Կարծում եմ, որ հեղափոխությունն, այո, անկատար է, չի ամբողջացվել, մտահոգության տեղիք կա։ Բայց ես չէի ուզի ֆետիշացնել երկրորդ նախագահի հանգամանքը որպես նոր բևեռի ստեղծում։ Բոլոր իշխանավորները՝ նախկին, ներկա, պետք է պատասխան տան իրենց արած-չարածի, հանցագործությունների համար։ Իրենց մեղսագրվող հնարավոր հանացագործությունները միայն սահմանադրական կարգը տապալելը չէ, հարցերի շատ ավելի լայն տարապատկեր կա»,- ասաց նա։

Հարցին՝ իր կարծիքով, որն է Ռոբերտ Քոչարյանի տեղը՝ բանտը, թե քաղաքականությունը, «Ժառանգություն» կուսկացության առաջանորդը պատասխանեց՝ մեղադրանքի հիմքը կա, մեղադրանքն այժմ պետք է ապացուցվի, մնացածը պետք է լուծի իրավական համակարգը։

«Դատարանը պետք է որոշում կայացնի։ Ինքը պետք է լինի այնտեղ, որտեղ արժանի է։ Ես չեմ կարծում, որ իր «վերադարձի» մեջ վտանգ կա, թեև ոմանց տվել է ռևանշի հույս։ Այս փուլում անհարկի խուճապի կարիք չկա»,- ասաց Հովհաննիսյնաը։

Իսկ մտավախություն  չունի՞, որ վարչապետի կողմից բարձրաձայնված անցումային արդարադատության մարմինները կարող են վերածվել Լինչի դատաստանի,  արդյոք այս պահին մեզ պետք է այդ համակարգը, հարց ուղղեցին լրագրողները։ Կուսակցության առաջնորդը նկատեց՝ նախ պարզ չէ, թե ինչ մոդելով այն պետք է կիրառվի։

«95-96 թվականից հետո մենք բոլորս ապրում ենք դե ֆակտո վիճակում, մենք չենք ապրում դե յուրե Հայաստանում։ Ցանկացած արտահերթ, անցումային արադարադատության մեխանիզմ պետք է նկատի առնի այդ ամբողջ պատմության ընթացքում կատարված մարդու իրավունքների խախտումները։ Այո, Մարտի 1-ը ներառյալ, բայց մենք ունեցել ենք ընտրությունների գողություն՝ 96 թվականից այս կողմ, Հոկտեմբերի 27։ Պետական ողջ (մարմինը պետք է ենթարկվի լյուստրացիայի, այսինքն՝ բոլոր բարձրաստիճան այրերը պետք է հրավիրվեն քննության։ Սա ինքնին քաղաքական կամք պահանջող մոտեցում է։ Պետք է կանչվեն այդ թվում բոլոր նախագահները։ Իսկ սա շատ դժվար հանձնառություն է։ Անգամ անցումային արդարադատության մեխանիզմների կիրառմամբ մենք էլի մնում ենք դե ֆակտո՝ փաստացի, դե յուրե հանրապետություն ունենալու վիճակից դուրս»,- նշեց Հովհաննիսյանը։

Անդրադառնալով սահմանադրական փոփոխություններ նախաձեռնելու հնարավորությանը՝ բանախոսը նշեց՝ ինքը կողմ է հանրաքվեի գաղափարին, լեգիտիմ Սահմանադրության ընդունմանը, սակայն օպտիմալ ժամկետ կարող է լինել ընտրություններին հաջորդած շրջանը։ «Մինչ այդ պետք է եղանակ գտնվի ընտրությունները կազմակերպել գործող Սահմանադրության կարգի համաձայն։ Բայց ամբողջ գործընթացը բերել հրապարակ, ճիշտ չէ։ Հրապարակը չի կարող փոխարինել իրավական մեխանիզմներին»,- ընդգծեց Րաֆֆի Հովհաննիսյանը։

Հարցին՝ Ժառանգությունն իրեն որ դաշտում է  դիտարկում՝ քաղաքական գործիչն ընդգծեց՝ իրենք ինքնության անցումային բարդույթի մեջ են, քանի որ ոչ կառավարություն են, ոչ ընդդիմություն։ «Ժամանակավոր վիճակի մեջ ենք գտնվում։ Բոլոր դեպքերում Ժառանգությունը կշարունակի իր սկզբունքային մոտեցումը, որի հիման վրա մենք դոգմայի վարդապետության եռանկյունի ենք առաջարկում՝ քաղաքացու իշխանություն, ազգայի շահ և պետական ինքնիշխանություն։ Ներկա դրությամբ մենք ողջունում ենք կառավարությանը, և հույս ունենք, որ մոտ ապագայում ավելի ծրագրային ալընտրանքներ կներկայացվեն»: