Ձեր վստահելի աղբյուրը

Հանցավորության դեմ պայքարի ոլորտում 2018 թվականի մայիսի 10-ից օգոստոսի 20-ը նախորդ տարվա նույն ժամանակահատվածի համեմատ համրապետությունում գրանցված հանցավորությունների ընդհանուր թիվն աճել է 12.3 տոկոսով: Այս մասին այսօր լրագրողների հետ հանդիպման ժամանակ հայտնեց ՀՀ ոստիկանության շտաբի պետ Արմեն Ղուկասյանը՝ ներկայացնելով 100 օրվա ընթացքում ոստիկանության կատարած աշխատանքների մասին:

«Ընդգծենք, որ դա հենց գրանցված հանցագործությունների թիվն է,  և աճը պայմանավորված է մի կողմից ոստիկանության հանդեպ քաղաքացիների վստահության աճով, մյուս կողմից՝ հանցագործությունները գրանցումից թաքցնելու արատավոր երևույթների բացառմամբ: Կարելի է փաստել, որ քաղաքացին այլևս չի խուսափում ոստիկանություն դիմելուց»,- ասաց նա:

Հաշվետու շրջանում, ըստ Արմեն Ղուկասյանի, ընթացք է տրվել հանցագործության մասին 13 հազար 215 հաղորդման, ինչը 2017 թ-ի նույն ժամանակահատվածի համեմատ աճել է 35.8 տոկոսով: Նշվեց, որ նախորդ տարվա նույն ժամանակահատվածում ընթացք է տրվել 9 հազար 730 հաղորդման:

Նրա խոսքով՝  ոստիկանության ամենօրյա ուշադրության կենտրոնում է հատկապես ծանր և առանձնապես ծանր հանցագործությունների բացահայտումը: Վերջին 100 օրվա ընթացքում, ըստ Արմեն Ղուկասյանի, բացահայտվել է վարույթում գտնվող քրեական գործերով 1253 ծանր, 133 առանձնապես ծանր հանցագործություն, այդ թվում՝ սպանության և սպանության փորձի 42, առողջության ծանր վնասվածք պատճառելու 108, բռնաբարության և բռնաբարության փորձի 17, հրազենի ապօրինի շրջանառության 206, մահվան ելքով ճանապարհային երթևեկության կանոնների խախտման 138, խուլիգանության 111, թմրամիջոցների ապօրինի շրջանառության 410, այդ թվում իրացման նպատակով 228 դեպք, թմրամիջոցների մաքսանենգության 66, ավազակության 23, կողոպուտի 82, գողության 1222, այդ թվում բնակարանային գողության 166, խարդախության 233 դեպքեր և այլն:

Ոստիկանության շտաբի պետը նաև հայտնեց, որ 100 օրվա ընթացքում հանրապետությունում հայտանաբերվել է կոռուպցիոն բնույթի 746 հանցագործության դեպք, ինչը նախորդ տարվա նույն ժամանակահատվածի համեմատ կրկնակի ավելի է: «Դրանցից 585-ը հայտնաբերվել է հենց ոստիկանության կողմից»,- ասաց Արմեն Ղուկասյանը: 

Նա նաև նշեց, որ ոստիկանության կողմից, առաջընթացն ակնհայտ է նաև լատենտային հանցագործությունների ոլորտում:
Ըստ Արմեն Ղուկասյանի՝ միայն Հանցավորության դեմ պայքարի գլխավոր վարչությունում բացահայտվել է պետությանը պատճառված 4,4 մլրդ դրամ վնասի փաստեր, որից 147 մլն դրամն արդեն վերականգնված է:

Ոստիկանության շտաբի պետը հայտնեց նաև, որ վարչապետի հանձնարարությամբ ոստիկանությունը մշակել է մի շարք վարչական իրավախախտումների համար կիրառված տուգանքների համաներման մասին օրենքի նախագիծ: Արդյունքում,  ըստ նրա, շուրջ 150 հազար մարդ ազատվել է նախկինում կուտակված մոտ 13,7 մլրդ դրամ տուգանք վճարելու պարտավորությունից: