Ձեր վստահելի աղբյուրը

««Լուսավոր Հայաստան» և «Հանրապետություն» կուսակցությունները Երևանի ավագանում ընտրություններում հանդես են գալու դաշինքով և ես գլխավորելու եմ այդ ցուցակը: Կներկայացնեմ արձակուրդ գնալու դիմում և այդ պայմաններում կմասնակցեմ նախընտրական քարոզարշավին: Նախարարի պաշտոնը չեմ համատեղի թեկնածուի կարգավիճակի հետ»,-այսօր լրագրողների հետ հանդիպման ժամանակ հայտարարեց Արդարադատության նախարար Արտակ Զեյնալյանը:

Նրա խոսքով, սա երկու կուսակցությունների համատեղ քննարկումների արդյունքում կայացված որոշում է:

«Կարծում ենք՝ սա Հայաստանի և Երևանի համար օգտակար և պիտանի կլինի, որպեսզի այս երկու կուսակցությունները մասնակցեն ընտրություններին, մասնակցեն դաշինքով և իմ գլխավորությամբ: Իսկ շանսերի վերաբերյալ ձեռնպահ կմնամ ինչ-որ բան ասելուց՝ կախված նրանից, թե ինչպես կքվեարկեն երևանցիները»,- ասաց նախարարը՝ հավելելով, որ դաշիքնի անվանումը քննարկման փուլում է:

Հարցին՝ ՀՀ երկրորդ նախագահ Ռոբերտ Քոչարյանի գործով դատավոր Ալեքսանդր Ազարյանն արդարադատությո՞ւն իրականացրեց, Արտակ Զեյնալյանը շեշտեց, որ ինք արդարադատության նախարարն է և այդ հարցին պատասխանելու իրավունք չունի: «Դա կլինի արդարադատության նկատմամբ միջամտություն: Ես իրավաբան եմ, իրավապաշտպան եմ, ունեմ իմ տեսակետը, բայց այն այս պահին չեմ կարող ներկայացնել որպես արդարադատության նախարարի տեսակետ: Ես ունեմ լիազորություններ, ազդեցության լծակներ և այդպիսի հարցին պատասխանելը կլինի խախտում»,- ասաց գործադիրի ներկայացուցիչը:

«Եթե կան հիմքեր, դատավորները պարտավոր են ինքնաբացարկ հայտարարել, հրաժարվել այդ գործի քննությունից, եթե կարծում են, որ կարողէ  տպավորություն ստեղծվել, որ իրենք անկողմնակալ և անաչառ չեն: Սա արդար դատաքննության իրավունքի ատրիբուտներից է»,- Արտակ Զեյնալյանը: