Ձեր վստահելի աղբյուրը

«Միջազգային կազմակերպությունները Հայաստանին գնահատական տալու են ոչ թե այսօր, այլ տարեվերջյան ամփոփիչ փաստաթղթերում, որտեղից էլ կարելի է հետևություններ անել, թե Հայաստանն ինչ ընկալում ունի ժամանակակից աշխարհում»,- լրագրողների հետ զրույցում այսօր ասաց Միջազգային իրավունքի և միջազգային հարաբերությունների մասնագետ Սուրեն Սարգսյանը։

Անդրադառնալով ԱՄՆ-Ռուսաստան հարաբերություններին՝ բանախոսը հիշեցրեց, որ Ռուսաստանին զուգահեռ՝ էներգետիկ ոլորտում պատժամիջոցների նոր ալիք է սպառնում նաև Իրանին։

«Սա Հայաստանի համար կարող է խնդրահարույց լինել։ Կան միջազգային բիզնես-կազմակերպություններ, որոնք դուրս են գալիս Իրանից՝ պատժամիջոցների տակ չհայտնվելու համար։ ԱՄՆ իշխանությունները, ի դեմս նախագահ Թրամփի, արդեն իսկ հայտարարել են, որ ամերիկյան կամ եվրոպական այն բիզնեսները, որոնք Իրանում ակտիվ գործունեություն կծավալեն, կենթարկվեն ամերիկյան պատժամիջոցների։

Նույնաբովանդակ հայտարարություն Հայաստանում կատարեց ԱՄՆ դեսպանը։ Այս ամենը հաշվի առնելով՝ հասկանալի է դառնում, որ գերտերությունների հարաբերությունները լարվելու են, և Հայաստանը լուրջ խնդիրներ է ունենալու։ ՌԴ-ի հետ մենք կապված ենք հարյուրավոր թելերով, ակնհայտ է, որ ռուսական տնտեսության մեջ ցանկացած վայրիվերում լուրջ ազդեցություն է ունենալու Հայաստանի վրա»,- ասաց բանախոսը՝ նշելով, որ վնասներ չկրելու համար հայկական կողմը պետք է ակտիվորեն աշխատի ամերիկացի գործընկերների հետ։

Սուրեն Սարգսյանը չբացառեց Թրամփ-Փաշինյան հանդիպումը, սակայն  նշեց, որ չի կարծում՝ դա տեղի ունենա սեպտեմբերին ՄԱԿ-ի գլխավոր ասամբեայի նստաշրջանում՝ Թրամփի՝ կանխատեսվող զբաղվածության պատճառով։

«Կարծում եմ՝ կարևոր քննարկան առարկա պետք է դառնա երկկողմ տնտեսական հարաբերությունների զարգացումն ու առաջընթացը։ Թրամփը բիզնեսմեն է, և եթե ցանկանում ես նրան ինչ-որ կերպ հետաքրքրել, պետք է առաջ քաշես տնտեսականշահի գործոնը։ Բիզնես կապերի զարգացումը պետք է առաջնային լինի, մեր կառավարությունը պետք է առավել ակտիվ աշխատի»,- ասաց բանախոսը։

Անդրադառնալով հայ-ռուսական հարաբերություններին՝ Սուրեն Սարգսյնան ընդգծեց, որ այստեղ որոշակի անհասկացվածություն և լարվածություն է նկատվում։ Նա միաժամանակ հիշեցրեց, որ ռուսական կողմն իր մտահոգությունների մասին բազմիցս արտահայտվել է փորձագիտական և այլ մակարդակներում։

«Կարծում եմ՝ Ռուսաստանը պետք է լինի մեր արտաքին քաղաքականության ամենակարևոր դիրքերում։ Մենք նրանից չենք կարող հրաժարվել, և չենք հրաժարվելու։ Նման լարված իրավիճակ ես չեմ հիշում վերջին 20 տարիների ընթացքում, և կարծում եմ, որ լարվածությունն ամեն գնով պետք է թուլացնել։ Այստեղ լուրջ աշխատանք կա անելու։ Պետք է հասկանալ՝ ինչն է անհանգստացնում մեր ռուս գործընկերներին և փոխզիջումային տարբերակով գալ խնդիրների կարգավորման։ ՌԴ-ն բազմիցս ակնարկել է, որ որոշ կադրային նշանակումներ իր համար անընդունելի է, և այստեղ կա անվստահություն»,- ասաց վերլուծաբանը։

Հարցին՝ ինչ վերաբերմունք է ձևավորվել Հայաստանի շուրջ վերջին 100 օրերի ընթացքում, բանախոսը նշեց՝  ոչ ընդգծված դրական, ոչ էլ ընդգծված բացասական։

«Հայաստանին ընկալում են այնպես, ինչպես ընկալել են։ Այն, որ այս իշխանությունները նախորդից տարբերվում են լեգիտիմության աստիճանով, արտաքին  ընկալման մեջ նման բան չկա։ Միջազգային գործընկերները լեգիտիմության մասով որևէ տարբերություն չեն դնում»,- նշեց Սարգսյանը։