Ձեր վստահելի աղբյուրը

Հայաստանի տնտեսության լոկոմոտիվի դերում լինելու է բարձր տեխնոլոգիաների արդյունաբերությունը։ Այս մասին այսօր ֆեյսբուքյան ուղիղ եթերում  հայտարարեց ՀՀ վարչապետ Նիկոլ Փաշինյանը։

Նրա խոսքով՝ դա վերաբերում է կոշտ արտադրանքին:  «Այս պահին արդեն նախանշաններ ու ներդրումային հետաքրքրություններ կան այս ոլորտի հետ կապված:  Այսօր նաև որոշակի հետաքրքրություն կա արևային էլեկտրակայանների պանելների արտադրության ուղղությամբ:

Սա այն ոլորտն է, որն իսկապես կարող ենք համարել հեռանկարային, քանի որ արևային էներգիան առաջիկայում լինելու է ամենահզոր ճյուղերից մեկը: Տեղյակ եմ, որ Հայաստանում կան ներդրումներ որոշակի տեխնոլոգիական ապրանքներ արտադրելու մասով, մասնավորապես,  հեռուստացույցերի և կենցաղային տեխնիկայի արտադրություն է սկսվելու։ Մենք պատկերացնում ենք , որ Հայաստանը պետք է լինի բարձր տեխնոլոգիական երկիր և շատ կարևոր է, որ լինի տեխնոլոգիական արտադրանքի արդյունաբերություն, որն իր հերթին բնականոն պայմաններ կստեղծի ռազմաարդյունաբերության զարգացման համար»,- ընդգծեց վարչապետը։

Նիկոլ Փաշինյանը կարևորեց նաև Հայաստանում ադամանդագործության ոլորտի զարգացումը:
Նա հիշեցրեց, որ նախկինում ադամանդագործությունը բավականին զարգացած էր Հայաստանում, բայց դրամի փոխարժեքի բարձրացման և ադամանդի շուկայում տեղի ունեցած ազատականացման գործընթացների հետևանքով այդ ոլորտը Հայաստանում խնդիրներ ունեցավ. «Հիմա կան ընկերություններ, գործարարներ, որոնք աշխատում են այդ ուղղությամբ և մենք հույս ունենք, որ նրանք հաջողություն կունենան, իսկ կառավարությունն էլ ամեն ինչով կաջակցի»։