Ձեր վստահելի աղբյուրը

Հայաստանում  տարբեր տարիներին պետք է համերգներով հանդես գային իտալացի հանրահայտ երգիչ և կոմպոզիտոր Էրոս Ռամազոտին, ռուս հայտնի երգչուհի Իրինա Ալեգրովան, ռուսական հայտնի «Լենինգրադ» խումբը։ Երեք համերգն էլ չէր կայացել։ Երեք համերգի կազմակերպիչն էլ նույն ընկերությունն էր՝ մոսկովյան Forpostart production-ը և երևանյան «Շոուսթար» ՍՊԸ-ն, որոնց տնօրենը Զառա Մխեյանն էր։

Համերգների չեղարկումից հետո «Իրազեկ և պաշտպանված սպառող» ՀԿ նախագահ Բաբկեն Պիպոյանը իրավապահների ուշադրություն է հրավիրել «Forpostart production» ընկերության գործունեության վրա։ Այնուհետև Զառա Մխեյանը  դատի էր տվել Բաբկեն Պիպոյանին և «Իրազեկ և պաշտպանված սպառող» ՀԿ-ին։

«Նա ասել էր, որ մենք մեկնաբանություն անելիս թույլ ենք տվել վիրավորանք, որով վնասել էինք իրենց բարի համբավը, երբ մենք կոչ էինք արել, որ նման կազմակերպությունների միջոցառումները  պետք է բոյկոտել։ Գործը գնաց դատարան, դատարանում ապացուցվեց, որ մենք որևէ միտք չենք հայտնել, որ  զրպարտել է կազմակերպությանը»,- Panorama.am-ին  հայտնեց Բաբկեն Պիպոյանը:

«Շոուսթար» ՍՊԸ-ն, բնականաբար, պետք է փոխհատուցեր այն ծախսերը, որոնք արվել էին Բ. Պիպոյանի կողմից դատական գործընթացի ժամանակ։ Ընկերությունը չէր ցանկացել փոխհատուցել, ԴԱՀԿ պետք է գանձում կատարեր։ ԴԱՀԿ որոշմամբ, «Շոուսթար» ՍՊԸ –ից հօգուտ Բ. Պիպոյանի բռնագանձվելու է 300000դրամ։

«Գանձումը դեռ կատարված չէ, գույքի նկատմամբ հետախուզում է հայտարարված»,- ասաց Բ. Պիպոյանը։