Ձեր վստահելի աղբյուրը

«Այսօր մենք ներկայանում ենք և Երևանի ավագանու ընտրություններին  գնալու ենք որպես «Երևանի հանրություն» դաշինք»,- այսօր կայացած մամուլի ասուլիսի ժամ անակ հայտարարեց քաղաքապետի թեկնածու Անահիտ Թարխանյանը։

Նա ներկայացրեց դաշինքի ցուցակը, որը գլխավորելու է ինքը՝ Թարխանյանը, վերջինիս հաջորդում են Արմեն Հովհաննիսյանը, Անի Երեմյանը և Արա Մուրադյան։

«Մեր հիմնական նպատակն է ներկայացնել հանրության շահերը։ Հիմնական շեշտը մենք դնելու ենք այն խնդիրների վրա, որոնք հուզում են Երևանի հանրությանը։ Գալիք ընտրությունները շատ կարևոր են, դրանք առաջինն են թավշյա հեղափոխությունից հետո, և շատ կարևոր է, որ հանրությունն ունենա բարձր վստահություն։ Առաջինը, որ մենք պետք է անենք, պահանջելն է, որպեսզի ԿԸՀ նախագահը հրաժարական տա։

Մենք չենք կարող հանրությանը բացատրել, թե ինչու է նա շարունակում մնալ ԿԸՀ նախագահ։ Մուկուչյանը կեղծել է ընտրությունների արդյունքները։ Նա երկար տարիներ  բոլորի կողմից մեղադրվել է կեղծարարությունների մեջ։ Նա ստորագրելէ  ընտրական ոչ պատշաճ արդյունքներ։ Միաժամանակ, գտնում ենք, որ ՀՀԿ-ն պետք է հրաժարվի իր քվոտաներից»,- ասաց Անահիտ Թարխանյանը՝ միաժամանակ հավելելով, որ նույնիսկ եթե Մուկուչյանը հրաժարական չտա, միևնույն է, իրենք մասնակցելու են ավագանու ընտրություններին։

Անդրադառնալով դաշինքի ծրագրային դրույթներին՝ քաղաքապետի թեկնածուն նշեց՝ 4 տարվա կտրվածքով մշակվելու են ծրագրեր, ամբողջ ծրագրի գումարը կազմելու է 1 միլիարդ դոլարին համարժեք դրամ։ «Մենք աշխատում ենք այն ուղղությամբ, որ 4 տարվա ընթացքում Երևանում ապահովենք 30 հազար աշխատատեղ։ Հիմնական ոլորտները, որոնց անդրադառնալու ենք, լինելու են առողջապահությունն ու շրջակա միջավայրը, սոցիալական խնդիրները և տրանսպորտը»,- ասաց Թարխանյանը։