Ձեր վստահելի աղբյուրը

«Գերմանիայի կանցլեր Անգելա Մերկելի՝ տարածաշրջան կատարած այցը ամենևին էլ պատմական չէր, այն որևէ գերբնական նշանակություն չուներ: Սա բավական արարողակարգային, ճանաչողական միջոցառում էր, որը վաղուց էր պլանավորվել՝ դեռ նախորդ իշխանությունների օրոք: Այցից Հարավային Կովկասի երեք երկրներից ոչ մեկում մեծ արդյունքներ չկան»,- այսօր լրագրողների հետ հանդիպման ժամանակ ասաց քաղաքագետ Ալեքսանդր Իսկանդարյանը՝ հավելելով, որ Հարավային Կովկասի պետություններից յուրաքանյուրն իրեն ավելի հզոր ու մեծ է կարծում, քան իրականում կա:

Քաղաքագետի խոսքով, Մերկելի օրակարգը Վրաստանի և Ադրբեջանի դեպքում առավել հստակ էր, ինչը չի կարելի ասել Հայաստանի մասին:

«Հետաքրքրիրն այն էր, որ երեք երկրներից յուրաքանչյուրին մոտեցումը բացարձակապես այլ էր: Եթե խոսենք Վրաստանի մասին, ապա այդ երկիրը դիտարկվում է ռուս-արևմտյան հակազդեցության համատեքստում, նա իրեն ցույց է տալիս համապատասխան կերպով: Սակայն ՆԱՏՕ-ի մասին խոսելիս վրացիները սառը ցնցուղ ստացան: Ինչ վերաբերում է Ադրբեջանին, ապա դեպի Եվրոպա գազի արտահանման թեման ավելի շատ պղպջակ է, առնվազն մոտակա տարիներին արտահանում տեղի չի ունենա: Լուրջ որևէ բան չի կարող լինել նաև նավթի արտահանման մասով, քանի որ Ադրբեջանը նման ծավալների ռեսուրսներ չունի՝ հետաքրքրելու Գերմանիային:

Հայաստանում, ի տարբերությունուն Վրաստանի, կանցլերից ոչինչ չէին խնդրել, ինչը բավական հաջող քայլ էր նոր կառավարության կողմից: Բեռլին այցի հրավերը դրական էր, այն ամենայն հավանականությամբ կկայանա: Ինչ վերաբերում է վիզաների ազատականացմանը, ապա այդ թեմայի շուրջ խոսակցություն վաղուց է տարվում: Իրավաբանական մանդատներ դեռևս չկան, բանակցություններ, որպես այդպիսին, դեռևս չեն սկսվել»,- նշեց բանախոսը:

Անդրադառնալով թուրք-գերմանական հարաբերություններին՝ Ալեքսանդր Իսկանդարյանը շեշտեց, որ դրանք ներկայումս շատ վատ վիճակում են: Իսկանդարյանը նկատեց, որ թուրքական կողմի հայտնի կարգախոսը՝ «Զրո խնդիր հարևանների հետ» փոխվել է և դարձել «Զրո հարևան՝ առանց խնդիրների»: