Ձեր վստահելի աղբյուրը

«Հայաստանի ազգային պատկերասրահի և պատմության թանգարանի մուտքին արձաններ տեղադրելու  վերաբերյալ մեզ դիմում էր եկել, որին կցված է եղել թամանյական էսքիզային նախագիծը, համաձայն որի՝ պատկերասրահի այդ հատվածում նախատեսված է ունենալ արձաններ, նշված է ինչ արձաններ»,- պաշտոնավարման 100 օրը ամփոփիչ ասուլիսում լրագրողներին ասաց մշակույթի նախարար Լիլիթ Մակունցը։

Նա նշեց, որ այդ նախագծի շրջանակում ոչ թե տրվել է գիտամեթոդական նիստի եզրակացություն կամ արձանագրություն, այլ գիտամեթոդական նիստն առանձին քննարկման փուլում քննել է այն, գտել, որ սկզբունքորեն այդտեղ չկա որևէ իրավախախտման  հանգամանք, սկզբունքորեն չի առարկել  այն գաղափարին, որ այդտեղ կարելի է արձաններ տեղադրել՝ պայմանով համապատասխան այն բոլոր չափանիշներին,  որոնք պետք է լինեն։

«Բայց դա չի նշանակում, որ գիտամեթոդական  նիստը տվել է պաշտոնական եզրակացություն և արձանագրություն։ Ավելին՝ մենք ունենք շատ սկզբունքային մոտեցում այս հարցում. հանրապետական  նշանակության հուշարձանները, արձանները չեն կարող տեղադրվել առանց լայն շերտերի հետ հանրային քննարկման, համապատասխան գերատեսչությունների հետ քննարկման, առանց կառավարության որոշման։

Եթե զբոսնել եք հրապարակում,  տեսել են, որ կան պատվանդներ, որոնք արդեն ոչ բարվոք վիճակում են, 50 տարի շարունակ տեղադրված են եղել, ինչը ևս փաստում է, որ արձանների տեղադրումը նախատեսված է եղել»,- ասաց Լիլիթ Մակունցը։

Նրա խոսքով, հանրային քննարկմանը պետք է դիտարկել, թե որ արձաններին պետք է նախապատվություն տալ։

Ավելի վաղ մշակույթի փոխնախարար Տիգրան Գալստյանը ֆեյսբուքյան էջում գրել է, որ մշակույթի նախարարությանն էր ներկայացվել թանգարանի մուտքի աջ և ձախ կամարների տակ Տրդատ 3-րդի և Գրիգոր Լուսավորչի արձանների նախագիծ (թանագարանի ճարտարապետներ Մարկ Գրիգորյանի և Ա. Ղազարյանի էսքիզային նախագծով այդ հատվածում նախատեսվում էր արձաններ, որոնց պատվանդանները կառուցվել են, բայց արձանները այդպես էլ չեն տեղադրվել):