Ձեր վստահելի աղբյուրը

Վերջին 100 օրվա ընթացքում միջամտություն է ցուցաբերվել և կանխվել թվով 32 հուշարձանների վտանգումը։ Լրագրողների հետ հանդիպմանն ասաց ՀՀ մշակույթի նախարար Լիլիթ Մակունցը՝ ամփոփելով պաշտոնավարման 100 օրը։ Նա առանձնացրեց այդ հուշարձաններից չորսը՝  դադարեցվել է «Հին Երևան» ծրագրի տարածքում իրականացվող անօրինական շինարարական աշխատանքները, Արամի 32-ում  կանխվել են հուշարձան-շենքի  փոփոխման աշխատանքները և չեղյալ համարվել 2017 տրված թույլտվությունը, կանխվել է Լոռու մարզում պահպանական գոտուց ավազահանման դեպքերը, դադարեցվել և իրավապահներին է ներկայացվել Խնձորեսկում անօրինական շինարարական աշխատանքները։

Լ. Մակունցը տեղեկացրեց, որ 30 միլիոն դրամ է հատկացվել երկրաշարժի 30-րդ տարելիցին ընդառաջ Գյումրու Ամենափրկիչ եկեղեցու վերջնական նորոգումն իրականացնելու, դեկտեմբերի 7-ին այն բացելու համար։

«Այս նախաձեռնությունը հնարավոր եղավ իրականացել նշված ոլորտում խնայողությունների հաշվին»,- ասաց նախարարը։

Նա նաև տեղեկացրեց, որ ձևավորվել են աշխատանքային խմբեր, աշխատում են օրենսդրական դաշտի կարգավորման հետ կապված, մասնավորապես «Կինոյի օրենքի» մշակման հարցում, թանգարանների, հուշարձանների,  թատրոնների հետ կապված։

«Լիահույս ենք և ամեն ինչ անելու ենք, որպեսզի մինչև տարվերջ ընդունվեն կինոյի և թանգարանի մասին օրենքները»,- տեղեկացրեց նախարարը՝ հավելելով, որ «Կինոյի մասին» օրենքի հետ կապված ունեն պատրաստի փաթեթներ, որոնք քննարկման փուլում են, բացի այդ նախատեսում են ներգրավել միջազգային փորձագետների՝ դրամաշնորհների դիմելու միջոցով, որովհետև միջազգային պրակտիկայի կիրառումն այս պարագայում կարող է կարևոր դեր խաղալ  ոլորտի զարգացման, միջազգային ներդրողներ ներգրավելու համար։

Նախարարը  խոսեց նաև կոչումների մասին՝ նշելով, որ տարիների ընթացքում  որոշ դեպքերում արժեզրկվել է կոչումների ինստիտուտը։

«Կոչումների նկատմամբ քաղաքականությունը պետք է մշակվի, իրականացվի  կառավարության կողմից, քանի որ վերաբերում է  բոլոր ոլորտներին։ Ի՞նչ կարող ենք մենք հիմա անել այս պարագայում, երբ  վերջնական քաղաքականություն չունենք այդ առումով, խստորեն հետևել այն բոլոր ընթացակարգերին, որով տրամադրվում են կոչումները, պետք է անկախ գործեն այն հանձնաժողովները, որոնք քննում են հայտերը»,- ասաց Լ.Մակունցը։