Ձեր վստահելի աղբյուրը

Օգոստոսի 3-7-ը Ծաղկաձորում  պետք է անցկացվեր Լեոնիդ Ենգիբարյանի անվան մնջախաղի միջազգային 7-րդ փառատոնը։ Սակայն այն չկայացավ։ Ավելի վաղ Panorama.am-ը Երևանի Մնջախաղի պետական թատրոնի գեղարվեստական ղեկավար, փառատոնի հիմնադիր-պրոդյուսեր Ժիրայր Դադասյանից տեղեկացել էր, որ այս տարի փառատոն չի լինելու, ֆինանսավորում չեն տալիս փառատոնի համար։

«Միշտ էլ մշակույթի նախարարությունն է տվել»,- ասել էր նա։

Պաշտոնավարման 100 օրն ամփոփիչ ասուլիսում լրագրողները հետաքրքրվեցին մշակույթի նախարար Լիլիթ Մակունցին, թե ինչու չկայացավ փառատոնը։ Նա նշեց. «Դեռևս նախորդ կառավարության ժամանակ կրճատվել էր մշակույթի ոլորտին հատկացվող բյուջեի չափը։ Որոշվել էր 16 միլիոն դրամի փոխարեն,  որ տարեկան տրամարդվում էր փառատոնի իրականացման համար, տրամադրվեր միայն 8 միլիոնը։ Պարոն Դադասյանի ու մշակույթի նախկին նախարարի միջև համատեղ պայմանավորվածություն էր ձեռք բերվել, որպեսզի ապահովի բավարար չափով այն որակը, որ իր առջև դնում էր պարոն Դադասյանը և փառատոնն անցկացնել երկու տարին մեկ։ Սա եղել է  նրանց ընդհանուր պայմանավորվածությունը։ Այս տարին եղել է այն տարին, երբ փառատոնը չէր իրականացվելու»,- ասաց նախարարը։

Նշենք, որ  Լեոնիդ Ենգիբարյանի անվան մնջախաղի միջազգային 6-րդ փառատոնը կայացել էր 2017 թ. հուլիսի 22-26-ը։

Ինչ վերաբերում է Մնջախաղի թատրոնի  շենքին, նախարար Մակունցը նշեց. «Նախորդ կառավարության կողմից տրամարդվել է այն հարկը, որ զբաղեցնում են նրանք՝ վարչական աշխատանք կատարելու համար։ Ներկայացումները խաղալու համար Պատանի հանդիսատեսի թատրոնի բեմն են օգտագործում։
Պարոն Դադասյանի բարձրացրած հարցը հետևայն էր, որպեսզի թատրոնը լիարժեք գործի, ունենա սեփական բեմը, առաջարկում էր այն հարկում, որը վարչական աշխատանքների համար իրենք զբաղեցնում են,  կատարեին շինարական փոփոխություններ, հարկը բարձրացնեին, մուտքը լիներ դրսի կողմից, ունենային առանձին մուտք, առանձին սրահ։ Խնդիրն այն է, որ շենքը հուշարձանային է, որևէ կերպ նման փոփոխություններ  չեն կարող լինել այդ շենքի պարագայում»։

Լ. Մակունցն ասաց, որ այժմ ուսումնասիրում են շենքեր,  որոնք կարող են հատկացնել թատրոնին համատեղության կամ ոչ համատեղության կարգով,  որպեսզի ծավալեն իրենց գործունեությունը։

«Նախնական ինչ-որ բան առաջարկվել էր, պարոն Դադասյանը բացասական է արձագանքել։ Նախարարությունում շարունակվում է փնտրտուքը, շուտով կներկայացվեն այն առաջարկները, որոնք միգուցե բավարարեն պարոն Դադասյանին։ Նա նաև ներկայացրել էր այն պահանջները, թե ինչպիսին լինի շենքը։ Դժավարությունը կայանում է  հենց դրանում՝ կոնկրետ չափորոշիչներով շենք է ուզում ունենալ»,- ասաց Լիլիթ Մակունցը։ 

Խոսելով փառատոների մասին, Լ. Մակունցն ասաց, որ 2019 թվականի բյուջեում կա քաղաքականության որոշակի փոփոխություն․ «Եթե նախկինում առանձին տողերով հատկացվում էր այս կամ այն փառատոնի համար ընդգծված հատուկ բյուջե, այս տարի  այդ տողերը վերացվել են, փառատոներն ընդհանուր են հավասարության սկզբունքին հետևելու համար»։

Նշենք, որ Երևանի Մնջախաղի պետական թատրոնը տեղծվել է 1974 թվականին և պետական թատրոնի կարգավիճակ է ստացել 1983 թվականին։ Չունենալով սեփական տարածք, թատրոնի բեմադրությունները ներկայացվում են Երևանի պատանի հանդիսատեսի թատրոնում՝ վարձակալության հիմունքներով։  2017 թվականին Երևանի  Գևորգ Քոչար 21 հասցեում գտնվող Ազգային գրապալատի շենքը տրվեցլ էր Մնջախաղի պետական թատրոնին։