Ձեր վստահելի աղբյուրը

«Բոլոր քաղաքական ուժերն էլ մրցակից են, բայց մրցակիցների մեջ կան մի քանիսը, որոնք «բարեկամական մրցակից» են, օրինակ՝ Հայկ Մարությանը։ Այսինքն՝ այն ուժերին, որոնք ընդդիմության շարքերում պայքարել են այսօրվա համար, համարում ենք բարեկամ-մրցակիցներ»,- ԿԸՀ-ում լրագրողների հետ զրույցում այսօր ասաց «Ժառանգություն» կուսակցության փոխնախագահ Արմեն Մարտիրոսյանը։

«Իսկ մեր շանսերը կարող են գնահատել միայն մեր քաղաքացիները։ Միայն կարող եմ ասել, որ մեր քաղաքացիների դատին եք ներկայացնելու ոչ միայն մեր ծրագիրը, որ զարգացման ծրագիր է, այլ նաև մեր անցած ուղին։ Ընտրություններին մասնակցելու ենք բաց ճակատով, որովհետև այն քչաթիվ ուժերից էինք, որ չտրվեցին իշխանությունների գայթակղություններին։ Մենք մշտապես եղանք ժողովրդի կողքին, ցանկացած պարագայում չկորցրեցինք մեր սկզբունքայնությունը։

«Ժառանգությունը» արդարության, ազնվության կուսակցություն է, Րաֆֆի Հովհաննիսյանը՝ անձնավորություն, որը հաղթել է 2013 թվականի նախագահական ընտրություններում, իր կյանքը նվիրաբերել հայրենիքին։ 2013 թվականին նա բառիս բուն իմաստով մեզ փրկեց հերթական արյունահեղությունից, արյունահեղությունը բացառվեց ի շնորհիվ Րաֆֆի Հովհաննիսյանի աչալրջության»,- ասաց Արմեն Մարտիրոսյանը։

Նա միաժամանակ տեղեկացրեց, որ իրենց կարգախոսը «Ժպտա»-ն է։ Ցուցակում ընդգրկված է 49 հոգի, առաջին եռյակում են Րաֆֆի Հովհաննիսյանը,  ինքը՝ Արմեն Մարտիրոսյանը, և Հովսեփ Խուրշուդյանը։

Հարցին՝ ինչո՞ւ երևանցին պետք է հենց իրենց ընտրի, Արմեն Մարտիրոսյանը կրկին շեշտեց՝ զարգացման ծրագրի պատճառով։

«Կարծում եմ՝ քաղաքացին պետք է հավանություն տա ոչ այնքան ծրագրին, այլ նրան, թե ծրագիր ներկայացնողը կարո՞ղ է այդ ծրագիրը կյանքի կոչել։ Կարծում եմ, որ բոլոր հիմքերն ունենք՝ երևանցիներ կողմից աջակցություն ստանալու»,- ասաց նա։

Լրագրողները քաղաքական գործչից նաև հետաքրքրվեցին՝ ինչպե՞ս է պատկերացնում  ավագանու ընտրությունների անցկացումը ԿԸՀ նախագահ Տիգրան Մուկուչյանի գլխավորությամբ։

«Այն, որ ԿԸՀ-ն շատ մեղքեր ունի, ակնհայտ է։ Այդ կառույցը արդարացրել է ընտրակեղծարարությունը։ Նախորդ գործունեությունը միանշանակա բացասական է, սակայն նոր լույսի ներքո կառույցն իր գործառություները կիրականացնի՝ ստիպված չլինելով կեղծիքներ հայտարարել։ Ես վստահում եմ նոր իշխանությունների քաղաքական կամքին, վստահում եմ ոստիկանյությանը և ԱԱԾ-ին, որ նրանք կկանխեն ընտրակեղծարարությունը»,- ասաց «Ժառանգության» փոխնախագահը։

Մարտիրոսյանը չբացառեց, որ ապագայում կարող են համագործակցել «Սասնա ծռերի» հետ, քանի որ որոշու ունեն՝ հաղթնակի դեպքում Երևանում միայնակ չեն «իշխելու»։