Ձեր վստահելի աղբյուրը

Երևանի մնջախաղի պետական թատրոնն ընտրվել է Մոսկվայում անցկացվող հեղինակավոր «Золотой Витязь» 16-րդ միջազգային թատերական ֆորումի փորձագիտական հանձնաժողովի կողմից և իր խաղացանկային «Արդաղիոն» ներկայացումով մասնակցության հրավեր է ստացել:

Panorama.am-ը Երևանի մնջախաղի պետական թատրոնի գեղարվեստական ղեկավար, ՀՀ արվեստի վաստակավոր գործիչ Ժիրայր Դադասյանից  հետաքրքրվեց, թե  ինչպե՞ս է եղել ընտրությունը, արդյո՞ք թատրոնը ֆորումին մասնակցելու հայտ է ներկայացրել։

«Բացառիկ թատերական միջազգային ֆորում է։ Մեր թատրոնն առաջին հայկական թատրոնն է, որ պետք է մասնակցի հեղինակավոր այդ ֆորումին»,- ասաց նա։

Ֆորումի կարգախոսն է՝  «Հանուն բարոյական իդեալների և հանուն մարդու հոգու մեծարման»։

«Ընտրվում են գաղափարախոսությանը համահունչ բարձրարժեք բեմադրություններ և ներկայացվում»,- նշեց Ժ. Դադասյանը՝ ընդգծելով, որ իրենք հայտ չեն ներկայացրել, այլ հենց փորձագիտական հանձնաժողովն է միանգամից ընտրել իրենց ներկայացումը։

«Քանի որ մեր թատրոնը ճանաչված է ռուսական փորձագիտական շրջանակներում և հատկապես «Արդաղիոն» ներկայացումը, որը մի քանի փառատոներում մրցանակների է արժանացել, փորձագիտական խորհրդի անդամներից հենց այդ փառատոների ժյուրիներում են եղել, այդ փորձագետներն անմիջապես, առանց փուլեր անցնելու, առաջարկել են որպեսզի մեր ներկայացումը լինի ֆորումի ավարտական փուլում, որը կայանալու է նոյեմբերի վերջին, դեկտեմբերի սկզբին»,- նշեց թատրոնի գեղարվեստական ղեկավարը։

Ժ. Դադասյանն ասաց, որ բոլոր  մյուս փառատոներից, որ իրենք հրավեր են ստանում և մասնակցում են, դրամատիկ թատրոնների մրցույթներ են լինում, ոչ թե  մնջախաղի փառատոներ։

«Շատերի մոտ սխալ կարծիք է ձևավորվում, որ մասնակցում ենք մնջախաղի փառատոների։ Ոչ, մենք մասնակցում ենք թատերական փառատոների խոսող թատրոնների հետ և շատ հաճախ Գրան պրի ենք ստանում։

Այս ֆորումին մասնակցելը մեզ համար շատ մեծ պատիվ է»,- նշեց Երևանի մնջախաղի պետական թատրոնի գեղարվեստական ղեկավարը։

Մրցանակաբաշխությանը կայանալու է Մոսկվայի կենտրոնական եկեղեցում դեկտեմբերի 10-ին։