Ձեր վստահելի աղբյուրը

Վրաստանում սեպտեմբերի 15-ից կարգելվի բեռնատարներով  ցորենի ներմուծումն ու արտահանումը:  Այդ որոշումը վերաբերում  է բոլոր այն երկրներին, որոնք իրենց տարածք ցորեն են ներկրում Վրաստանով: Ի դեպ, այդ արգելքը տարածվում է նաև վրաց բեռնափոխադրողների վրա:
Արգելքի պատճառն, ըստ վրացական կողմի, այն է, որ ցորենով բեռնված մեկ բեռնատարը զգալի վնաս է հասցնում իրենց ճանապարհներին։

Խնդրի վերաբերյալ Panorama.am-ը զրուցեց ՀՀ տրանսպորտի, կապի և տեղեկատվական տեխնոլոգիաների փոխնախարար Արմեն Փամբուխչյանի հետ:

Փոխնախարարի խոսքով՝ բեռնափոխադրող ընկերությունները զգուշացվել են, որ այլևս չեն կարող անցնել Վրաստանի տարածքով և փոխադրումները պետք է իրականացվեն միայն ծովային ճանապարհով և երկաթգծով։

«Այս պարագայում մեզ մնում է միայն մեկ տարբերակ. բեռնափոխադրումն իրականացնել  լաստանավով՝ Նովոռոսիյսկ- Փոթի նավահանգստով, որից հետո բեռները երկաթուղով կներկրվեն  Հայաստան: Սա է ճանապարհը, ուրիշ ճանապարհ չունենք»,- ասաց նա՝ հավելելով, որ այդ որոշումը վերաբերում է բոլոր երկրներին, որոնք ցորեն են տեղափոխում Վրաստանի միջոցով:

Արմեն Փամբուխչյանի խոսքով՝ հաշվի առնելով ստեղծված իրավիճակը, այժմ  հայկական կողմը բանակցություններ է տանում վրացական կողմի հետ՝ բեռնափոխադրումների գնի թանկացումը նվազագույնի հասցնելու համար:

«Բանակցություններ են  ընթանում «Հարավկովկասյան երկաթուղի» և «Վրացական երկաթուղի»  ընկերությունների հետ, որպեսզի դեպի Հայաստան  բեռնափոխադրումների գները չբարձրանան և հայ բեռնափոխադրողները կարողանան նորմալ գներով բեռները տեղափոխել: Այսինքն՝ ամեն ինչ արվում է, որ բեռնափոխադրման ժամանակ  գնային փոփոխություններ չլինեն, դա էլ իր հերթին չբերի ցորենի գներ բարձրացման»,- նշեց Արմեն Փամբուխչյանը: