Ձեր վստահելի աղբյուրը

«Հայաստանի տնտեսության զարգացման առումով շատ կարևոր է հանքարդյունաբերության ոլորտը»,- այսօր լրագրողների հետ հանդիպման ժամանակ նման կարծիք հայտնեց  ՀՀ էներգետիկ ենթակառուցվածքների և բնական պաշարների նախարար Արթուր Գրիգորյանը:

Նրա խոսքով՝  այդ ոլորտում կատարվել է խորը ուսումնասիրություն:

«Այս ոլորտում բավականին աշխատանքներ եղել են կատարված, բայց մենք դա համարել ենք ոչ բավարար»,- նշեց նախարարը:

Արթուր Գրիգորյանը նշեց, որ այսօր Հայաստանում 27 մետաղական հանքավայր ունի շահագործման  լիցենզիա: 

«Մեր ուսումնասիրության արդյունքում՝ 27 հանքավայրից 10-ին տրվել են զգուշացումներ, քանի որ ուսումնասիրությունը ցույց տվեց, որ շահագործումն իրականացվում է օրենքով սահմանված չափանիշներից դուրս»,- ասաց Արթուր Գրիգորյանը:

Ինչ վերաբերում է ոչ մետաղական հանքավայրերին, ապա 146  ոչ մետաղական հանքավայրի  նույնպես տրվել են զգուշացումներ, որպեսզի վերացնեն իրենց մոտ առկա թերությունները:

Նախարարի խոսքով՝ զգուշացումը նշանակում է, որ ընդերքն օգտագործող ընկերությունները 90 օրվա ընթացքում պետք է իրենց կողմից վերացնեն բոլոր թերությունները. «Եթե 90 օրվա ընթացքում չվերացնեն, կզրկվեն լիցենզիայից: Այս գործընթացը լինելու է  շարունակական, մենք կանգ չենք առնելու։ Դուք գիտեք, որ ՀՀ վարչապետի դիրքորոշումն այդ առումով բավական խիստ է, և հանքարդյունաբերության ոլորտը պետք է բերվի իրավական դաշտ»։

Անդրադառնալով Թեղուտի խնդրին՝ Արթուր Գրիգորյանն ասաց, որ Թեղուտի վերաբերյալ կառավարությունն առանձնահատուկ մոտեցում է  ցուցաբերում, և խնդիրն այնտեղ  հիմնականում կապված է պոչամբարի պատվարի շինարարական ռիսկերի հետ, քանի որ ժամանակին ճիշտ տեխնիկական եզրակացություն չի տրվել:

«Այդ ռիսկը թույլ չի տալիս գնալ բացարձակ աշխատանքների, և որպեսզի ճիշտ գնահատվի իրավիճակը, ընկերությունը ժամանակավոր դադարեցրել է շահագործումը: Դա ցավալի իրավիճակ է, քանի որ «Թեղուտ»-ի հանքավայրի շահագործման պատճառով 800 աշխատակից անգործ է մնացել, մենք մտահոգ ենք այդ առումով և փորձելու ենք հնարավորինս  արագ տալ լուծումներ՝ հաշվի առնելով նաև ռիսկերը: Իհարկե  մեզ համար առաջնահերթ է մնում հանքավայրի շահագործման անվտանգության խնդիրը»,- ընդգծեց նախարարը:

Ինչ վերաբերում է «Լիդիան Արմենիա» ընկերության աշխատանքներին՝ Արթուր Գրիգորյանն ասաց, որ այստեղ ևս Բնապահպանության և ընդերքի տեսչության կողմից կատարվում են ուսումնասիրություններ:

«Այս իրավիճակը ցավոտ ենք գնահատում, քանի որ այդ ընկերության կողմից բավականին լուրջ ներդրումներ են իրականացվել, բայց չենք կարող հաշվի չառնել այն բնապահպանական խնդիրները, որոնք այսօր բարձրացնում են: Մեր դիրքորոշումը հետևյալն է՝   պետք է ամեն ինչ անենք, որ չխաթարենք ներդրողի կողմից կատարված աշխատանքը և առհասարակ Հայաստան եկող ներդրումները, պետք է շատ զգուշավոր լինենք, միևնույն ժամանակ  չպետք է մոռանանք բնապահպանական  խնդիրները»,- նշեց Արթուր Գրիգորյանը:

Նրա խոսքով՝  տեսչությունն արդեն ներկայացրել է իր եզրակացությունը, որ մեկ–երկու խնդիր է hայտնաբերել, որի վերաբերյալ պատրաստում է ՇՄԱԿ փորձաքննություն իրականացնել: